ازمة إرتباط !! الحلقة الاولي (الجديه)

[Rena Jesus]

ازمة إرتباط !!
الحلقة الاولي
مفيش ادنى شك ان من اصعب الازمات اللى بتواجهنا كشباب دلوقتى هى موضوع الإرتباط
.... طيب ليه؟؟


لية الموضوع اتحول لأزمة؟؟ ليه مش عارفين نرتبط؟؟؟
لية مش قادرين حتى نوصل لبعض؟؟ لية الدنيا مقفلة فى وشنا؟؟؟
لية البنات مصدومة و خايفة ترتبط بحد و يطلع وحش؟
لية الولاد مش قادرين يرتبطوا ببنات كتير مع انهم يبدوا من الخارج انهم حلوين شكلا و طباعا؟؟
لية و لية ولية؟؟
كل الاسئلة دى نقلت موضوع الارتباط من جزئيتة الاجتماعية الى مشكلة عصر

بس صدقونى انتوا اللى هتحلوها بنفسكم

طيب انا هكلم الولاد اولا ..
انت تعرف ايه اكتر حاجة البنت نفسها تشوفها فيك وانت بتتعرف عليها؟؟ هاا
اوعى تقول الشياكة و الفلوس وانك جاهز او حتى انك تكون راجل مؤمن ومحترم وملتزم دينيا؟؟ عارف ايه
اكتر حاجة البنت نفسها تشوفها فيك هى ( الجدية) سامعنى؟؟

لما تكون احلى راجل فى الدنيا و فيك كل المميزات ..
والبنت ملمحتش فيك الجدية فا انسى.. الموضوع هيقف ..
هتخاف منك .. مش هتكمل تواصل معاك طول ما هى مش شيفاك جاد ..

و الكلام ده للبنت برضو .. الولد لو شافك قمر قمر..
وفيكى كل المميزات لكن انتى مش جادة فى التعارف او التواصل فى اطار الارتباط ..
وانك مماطلة و مش بتقولى كلام واضح .. فا صدقينى ما هيكمل معاكى
يعنى اول مشكلة معانا النهاردة ولازم نحلها هى ( الجدية)

لو انت او انتى مش جادة فى موضوع الارتباط فا من فضلك متفتحش نفسك للناس او انك تبقى متاح للتعارف للإرتباط ..
اظهر نواياك الواضحة فى التعارف

يعنى لو بتتعرف على بنت حاول تبين ده ..
وطبعا البنات اذكيا و بيلقطوا ان الولد بيسال اسئلة معينة فا بتتعرف انه بيتعرف عليها اكتر
وجود الجدية امر اساسى فى اننا نتواصل مع بعض
فى عدم و جود الجدية فا مشروع الارتباط نفسة مش هيكمل و البنت هتتهرب من التواصل مع الولد لعدم احساسها بالجدية و نفس الحال مع الولد اللى شايف البنت طول الوقت تهريج فى تهريج و هزار و 90 % من كلامها كلة ضحك و كلام تافهه و مفيش جدية ابداا .. الولد هيفصل منها و مش هيكمل تواصل

اه على فكرة
الولد اللى بيفكر يرتبط بيدور على واحدة عاقلة .. حلوة ..
تربى عيالة و تفتح بيته و يثق فيها.. فا البنت التفاهه ملهاش مكان فى موضوع الارتباط ده الا فى حالة واحدة .. ان فيه حد بيموت فيها و مش فارق معاه تكون بنت ناضجة او لا.. فا ده بيتجوز و بيعانى بعد كدة

خلاصة اول حلقة من حلقات ازمة ارتباط اللى هنكمل فيها الوقت الجاى
هى : من فضلكم اظهروا جديتكم لبعض اثناء تعارفكم علشان نكمل تعارف ..
وحتى لو التعارف كمل و لقيتوا نفسكم مش مناسبين لبعض فا مفيش مشكلة ..
برضو نحترم بعض و نقفل الموضوع ببساطة.... اتفقنا ؟؟؟؟

حلقتنا الأولى هى
( لازم نظهر جديتنا فى التعارف فى اطار الارتباط .. فى وجود الجدية هيكون فيه بيئة أمنة مريحة للطرف التانى انه يكمل تواصل معاك)


لو حابب تقرأ الحلقه اللى بعد كده من هنا


أزمة ارتباط - الحلقة الثانية ( النضوج )


cpd

[Mary Naeem]

مشاركة جميلة جدا

ربنا يبارك حياتك

[marit jesus]

ربنا يبارك خدمتك الجميلة والمثمرة

[Rena Jesus]

ميرسى لمروركم الغالى

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[walaa farouk]

ميرسي على مشاركتك الجميلة

[Rena Jesus]

ميرسى لمروركم الغالى