البابا كيرلس ادانى كيرلس

[walaa farouk]

البابا كيرلس ادانى كيرلس
🙏🙏🙏🙏🙏🙏🙏



سلام ونعمه حابه أقولكم واشهد على عمل ربنا معايا بشفاعة البابا كيرلس في ليلة يوم 2اغسطس سمعت حمايا بيتكلم عليا وبيقول ما دي خلاص مش هتخلف ولفت على السقط واللي بيسقط عمره ما هيكمله حمل لأني اجهض ثلاث مرات ولكن في كل مرة كنت بقول يارب أديني طفل يكون ليك لكن لو مش هيخدمك
مش عايزاه ولما ربنا سمح بالاجهاض ثلاث مرات قولت أصلهم مكنوش هيمشوا في طريق ربنا وكنت متعزيه بالسلامة اللي جوايه لكن لما سمعت حمايا بيتكلم عليا وقفت قدام صورة البابا كيرلس وبكيت بحرقه وقولتله اتشفعلي عند رب المجد يديني طفل أنا عارفه أنه هيديني في الوقت اللي هو شايفه مناسب لكن هما مش عارفين وأنت سامعهم بيقولوا إيه ولقيت نفسي هديت وتاني يوم علطول كان في راهبه جايبه معاها حزام البابا كيرلس لوحده قريبتها وصادف أن صاحب جوزي كان في نفس البيت
بيسلم على المريضه وراح قال للراهبه ممكن تديني الحزام لمرات صحبي بتسقط علطول ونفسهم يحصل حمل ويكمل وبالفعل جابوهلي عرفت أن البابا من حنيته بيطمني أنه سمع لصوت صلاتي وقولت لجوزي ربنا هيدينا كيرلس ومش بس كدا دا في تاكيدات تاني جوزي بعدها راح رحله للانبا صموئيل المعترف وقابل راهب أسمه أبونا ويصا راهب بسيط جداً وقالوا دا بركه راح حكالوا قالوا ربنا هيديك كيرلس وهتجيبه هنا هو وأمه وسته وفي شهر عشرة عرفت اني حامل وفي عيد ماري جرجس في شهر 11جوزي أدى أبونا مبلغ بسيط راح أبونا طلعله وصل بأسم كيرلس من غير ما يقوله حاجه ووهو ماشي في الشارع وأحد ماشي ينادم عليه ويقوله يا أبو كيرلس وهو لسه معرفناش نوع الطفل وراح مسكه وقاله مش راضي ترد عليه ليه يا أبو كيرلس وفي شواهد تانيه بتقول انه كيرلس وجه كيرلس وهو دلوقتي خريج بكالوريوس تجاره وفي الجيش .