انا مش فاهم ..
ليه هتاخدوا الموضوع ده ..
على انه حاجة نكدية ..
دى وصيتى على الملأ ..
انا فعلا عايز كدة ..
مش عايز ورد فى جنازتى ..
ولا ورد صلبان ولا بوكيهات مجاملة ..
اللى هيتدفع فى المجاملات دى ..
ولادكم اولى بيه ..
وانا بصراحة ايدى هتبقى مشغولة ..
مش هاعرف المس حتى اى بوكيه فيهم ..
ومش عايز صندوق غالى ..
ولا خشب معتبر ..
انا اساسا ..
مش هابقى حاسس بيه ولا بشكله ..
ويادوب هى نص ساعة ..
والصندوق نفسه هيختفى ..
ومش عايز صور تتبروز وتتعلق ..
الحيطان لو هتشيل صور ..
تشيل صور اللى عايشين ..
وبينا ذكريات ..
ولو لازم يبقى فيه صورة ..
تبقى صورة على ورقة a4 ..
تتطبع الوان .. وتتلزق ع الصندوق ..
بحيث يختفوا هم الاتنين سوا ..
والمكان اللى انا هاتحط فيه ..
حلو ان يبقى فيه حاجة مكتوبة من برة ..
بس نفسى فى حاجة تكون بتضحك ..
يعنى مثلا ممكن تكتبوا ..
ماتقفش هنا كتير ..
عشان وراك مشاوير ..
او مثلا ..
مش لازم تيجى كام مرة فى السنة ..
انا اصلا مابقيتش موجود هنا ..
حاجة كدة ..
والحاجة الاهم ..
مش عايز لبس اسود ..
باكره الاسود ..
وعايز الغيه من المناسبات دى اصلا ..
مالهوش اى لازمة ..
تكلفة زيادة ع الفاضى ..
للى ماعندوش اسود كتير
وفى الحر بيعمل مشاكل وسخونة ..
وانا اساسا مش باطيق الحر ..
كفاية 3 ايام بس اسود ..
وكله يرجع للبسه الطبيعى ..
اما المناسبات اللى بعد كدة ..
الاربعين والذكريات وكدة ..
مش عايز عزومات واكل والكلام ده ..
ولا كروت وتماثيل وصلبان ..
تتوزع على الناس ..
ومايبقوش عارفين يعملوا بيها ايه لما تكتر عندهم ..
المعاد سهل جدا تعلنوا عنه ..
من غير تمثال تكلفته 40 جنيه ..
وانت مضطر تجيب منه 50 قطعة للعائلات ..
و30 قطعة اصغر للشغل ..
والاصحاب بقى ..
نجيب لهم الصغير خالص ابو 10 جنيه ..
اللى هيعمل كدة ..
يخلى الفلوس لاحتياجات اللى عايشين احسن ..
انا صاحب الليلة ..
وانا اللى باقول كدة ..
ومش عايز اخبار مدفوعة فى اى صحافة ..
كفاية بوست ع الفيسبوك ..
ورسايل على الواتساب والفايبر ..
بتنتشر اسرع ..
ونيجى بقى للكبيرة ..
ممنوع منعا باتا ..
الصويت والصوت العالى ..
ممكن طبعا الدموع ماليش حكم عليها ..
بس كدة ..
مش عايز بقى كومنتات من باب ..
بعيد الشر ..
وليه بتقول كدة ..
وماتفولش على نفسك ..
انا باتكلم بجد ..
بس بدل ما اتكلم ..
وحد ياخد الكلام على نفسه ..
جبته فيا ..
عشان انا فعلا الموضوع ده شاغلنى ..
لما بالاقى ناس ..
تاعبين نفسهم فى كل التكاليف دى ..
م الآخر ..
ناس كتير اولى بالفلوس دى ..
واهو خير باسمى ..
أمير تادرس
