في أمل في العلاج

[walaa farouk]

ياما فقدنا الأمل في حاجات حاولنا فيها ومعرفناش نحققها بس المرة دي فيه أمل كبير أنها تتحقق!


حاجات كتير في حياتنا بنفقد فيها الأمل بسبب أننا حاولنا فيها كذا مرة وفشلنا نحققها، فاهم جداً المرحلة دي ومبقدرش آلوم أي شخص وصل ليها، لكن أشجعك تجرب طرق مختلفة ممكن تظبطلك سكتك وتحطك على أول طريق العلاج ” لو بجد أنت عايز “

هنفكر في المقال ده في الطرق اللي ممكن فيها نتخلص من مشاهدة المواد الإباحية والعادة السرية، تعالوا نشوف إيه هي الطرق:-

اعترف إنك في مشكلة:- أعترافك بوجود مشكلة لنفسك ولله مش عيب على فكرة كلنا عندنا مشاكل، وكمان متقولش كل جيلي بيعمل كده لأن حتى لو حواليك ناس كتير بتعمل كده ده مش معناه أنهم صح وأنك تاخدهم قدوة ليك ، علشان تبدأ في طريق الشفاء لازم تعترف أن في مشكلة فعلية محتاج تتخلص منها.

اكتب الأضرار والفوائد:- من جهة ليها فوائد فطبعاً ليها، بتخليك مبسوط فترة من الوقت بتساعدك في الأول تلاقي حاجة تشغل بيها نفسك عن الناس وعن الوحدة اللي انت عايش فيها، بس بعد كده بتبقى سجين ليها ومش بتقدر تتخلص منها بسهوله وبتلاقي الدنيا كلها حواليك باظت وانت مش عارف تتصرف، وأضرارها مثلاً أنك نتيجة الممارسات دي بتأثر على علاقاتك وتخليك عصبي وأوقات كمان لو أنت متجوز بتأثر أوي على علاقتك الزوجية وللأسف بتجيب أمراض.

اهرب:- الهروب مش عيب ولا ضعف بالعكس الهروب أوقات بيكون قوة، علشان كده أهرب من كل حاجة بتشدك ناحية الممارسات دي، يعني مثلًا لما بتقعد لوحدك بتتفرج أكتر حاول متقعدش لوحدك بقدر الأمكان، لو قبل ما تنام بتقعد تتفرج من على الموبايل وتمارس العادة السرية متدخلش تنام غير لما تكون عايز تنام فعلًا ومتخدش معاك الموبايل أو سيبه في أوضة تانية، لو مجموعة من أصحابك بيشجعوك على الممارسات دي اقطع علاقتك بيهم، عارف أن كل ده صعب لكن الشفاء بيحتاج تضحية ومهما كانت التضحية أو الخسائر أنت الكسبان برضة لأنك بتكسب نفسك وعلاقات أفضل جديدة في المستقبل.

اطلب مساعدة:- طلب المساعدة مش عيب خالص على فكرة بالعكس كلنا بنحتاج مساعدة في حياتنا، محتاج تطلب معونة من الله وتثق فيه أنه يقدر يحررك وكل مرة تحس أنك هتقع تاني أقوله انقذني، وكمان محتاج تختار حد ناضج تثق فيه تشاركه وتطلب منه يساعدك وتلجأ له في الوقت اللي هتحس فيه أنك مش قادر وهترجع تاني عن خطوات التعافي اللي اخدتها، بس أوعى تلجأ لأي حد لازم يكون حد حكيم وواعي ويقدر يساعدك.

لا تيأس:- هتلاقي نفسك في الطريق وقعت أوقات، لأن التعافي مش سهل وخصوصاً لو انت واصل لمرحلة الإدمان، اوعى تيأس وتقول خلاص مفيش أمل مني، أنت كده بتعمل زي اللي بيقع في الرملة وبدل ما يقوم ينفض هدومه بيتمرمغ فيها ويقول مش هقدر أقوم، لو وقعت قوم نفض هدومك ومتستسلمش بسهولة، وقول لنفسك المرة الجاية هقاوم أكتر، وأجري على ربنا توب وأطلب منه قوة مقاومة المرات الجاية.

[Mary Naeem]

وقول لنفسك المرة الجاية هقاوم أكتر، وأجري على ربنا توب وأطلب منه قوة مقاومة المرات الجاية.
ربنا يفرح قلبك

[walaa farouk]

ميرسى على مرورك الغالى مرمر