بعيد عنك .. حياتي عذاب !! "

walaa farouk · رقم المشاركة : ( 1 ) 27 - 08 - 2016, 12:07 AM

" أنا حضيع لو انتا مش موجود " , " حياتي و انتي مش فيها ملهاش معني " و حاجات تانية كتيرة من نوعية الجمل ديه بنسمعها في أفلام الحب العربي أو أغاني الحب الجديدة ... و لما بنسمعها بنحس بنوع رائع من الرومانسية أو الله قد ايه الكلام ده جميل !! .. بس في الحقيقة ديه حاجة خطيرة جدا ,,
في مقالة للكاتب Kurt Smith بعنوان The Danger in Saying ‘I Can’t Live without You’ .. بيقول أن جملة زي " أنا مقدرش أعيش من غيرك " ممكن تأسس لعلاقة ضعيفة و مؤلمة جدا , علي الشخص اللي بيقولها و اللي بتتقاله ! .. مبدأيا كدة , مفيش حاجة أسمها مقدرش أعيش من غير حد حتي و لو بحب الحد ده لأقصي درجات الحب ! .. فيعني أيه لو شخص ما أختفي من حياتي لأي ظرف تبقي خلاص ديه نهايتي ! فهل أنا ضعيف لدرجة أني معتمد علي شخص تاني عشان أستمر في الحياة ؟! و أيه اللي يخليني أوصل للمرحلة ديه ؟ .. فأنا اللي عملت كدة في نفسي في الأساس ,, أنا اللي ربطت سعادتي و أحلامي بأشخاص بحبها ممكن تتغير , بدل ما أربطها بقيمة زي الحب مهما مر عليها الزمن لا يمكن تتغير .. أنا اللي قيدت نفسي بوهمي ! .. فحتي و لو الجملة ديه بتتقال بمعني تخيلي , بس الصياغة في حد ذاتها بتحمل تواكليه و تابعية شديدة ..
علي الناحية التانية , تخيل أنتا شخص بيتقال لك " أنا مقدرش أعيش من غيرك " .. تخيل العبء اللي بيتم ألقاءه عليك , طب هل أنا لو قررت أبعد حتبقي جريمة في حق الشخص اللي وثق فيا و قرر يدني مفاتيح حياته ؟! هل لو مر بألم او صدمة من الفراق ده , يبقي أنا السبب ؟! .. و كل ده ليه ؟! ليه تجبر اللي بتحبه أنه يكون شريك في علاقة حاسس بمسؤولية أكبر من حجمه تجاها ؟ و يبقي سبب أساسي لأستمراره في العلاقة ديه , هو أنه مشفق عليك و بيعاملك كمريض محتاج رعاية !! فتكون علاقة قايمة علي الأحتياج أكتر منها التشارك او التكافئ .. علاقة ناقصة !
فحتي و لو بنحب بعض بجنون , حتي و لو مشاعرنا تجاه بعض مفيش كلمات تقدر توصفها أو تقدرها , حتي و لو خلاص مفيش غيره او خلاص مفيش غيرها ! برضة وسط كل ده , لازم يتم الحفاظ علي كيانا الشخصي و الأهم , حبنا يكون مبني علي أسس قوية من النضوج العاطفي ... في النهاية حنهي بمقطع للفيلسوف الهندي " أوشو " عن النضوج و الحب :
" في الحقيقة الشخص الناضج لا يقع في الحب ، بل ينهض بالحب ، الكلمة يقع ليست صحيحة ، فقط الأناس الغير ناضجين يقعون : هم يتعثرون و يهبطون بالحب ...بطريقة ما هم كانوا ناجحين و واقفين ، الآن هم لا يستطيعون النجاح و لا الوقوف ...هم كانوا مستعدين دائما ً للسقوط على الأرض و الزحف ، ليس لديهم العمود الفقري ، ليس لديهم الصحة ليقفوا لوحدهم .. الأشخاص الناضجين لديهم الكمال ليقفوا لوحدهم ، وعندما يقوم شخص ناضج بإعطاء الحب فهو يشعر بالامتنان لأنك قبلت حبه .. و هو لا يتوقع منك أن تكون شاكرا ً له .. كلا .. كلا على الإطلاق ، فهو لا يحتاج إلى امتنانك له .. هو يشكرك أنت لأنك قبلت محبته لك ... وعندما شخصيتان ناضجتان تكونان في علاقة حب .. واحدة من أعظم تناقضات الحياة تحصل .. إحدى أجمل الظواهر و هي : أنهما معاً و لحد الآن و بشكل هائل يتمتعان بالفردية ! . فهما سوية إلى حد أنهما تقريبا ً واحد ، لكن وحدانيتهما لا تدمر فرديتهما ، ففي الحقيقة .. إنها معززة و محسنة لها .. لذلك الاستقلالية تزداد فيهم "

* بقلم: د. #كيرلس_بهجت