4 تخيلات من فيلم إكس لارج مهمين لحياتك

[walaa farouk]

[i] 4تخيلات من فيلم إكس لارج مهمين لحياتك "

نادراً لما بشوف فيلم مصري حديث .
. لكن خليني أعترف إن فيلم إكس لارج من أنضف الافلام
اللي شوفتها في السينما المصرية في القرن الحالي .

للفيلم عدة حقايق لو عرفتها و إهتميت بيها حياتك هاتتغير للافضل :

١) (يا تخيين)👴
إنت بطل الفيلم ، حتي لو إنت مش تخين بس الفيلم موجه ليك إنت .
. مش المقصود السمنة تحديداً .
. المقصود إن فيه نقطة ضعف عندك هي اللي معطلاك
(خطية ، إدمان معين ، عيب قاتل في شخصيتك
، سلوك خاطئ ، خوف من الفشل ، ..الخ)
وهي اللي لو انتصرت عليها حياتك هاتبتدي تتغير تغير جذري
.. وهو رامز ليها في الفيلم بالسمنة .

٢) (اوف بقي ياخالي)😩
كلنا محتاجين في حياتنا حد زي خال أحمد حلمي
اللي هو إبراهيم نصر .
. يواجهك بحب لما تكون ماشي غلط بدافع إنك تكون
في أفضل حال ويفضل يوجهك أو بمعني أصح يكون مرايتك
.. شخصية إبراهيم ناصر كان راجل زيه أكبر في السن
مش من الجنس الآخر و الجميل في شخصية خاله إنه مكانش مسيطر أو متسلط كان بيعمل كدة بحب و الاتنين كانوا بيحبوا بعض بجد
.. لما يكون حد فوق راسك بيوجهك بمحبة
وينتقدك يمحبة ده هايفرق معاك جدا في حياتك وهاتحس بالفرق في المستقبل .

٣) (بتنهج وانت بتلبس الشراب)🦶
فيه حاجة متقلاك جدا ومخلياك تخين جداً ومش قادر تتحرك ومعطلاك ومخلية أمور كتير متعطلة في حياتك .
. الحاجة دي هي روتين الذات و عدم الإرادة
أو بمعني أدق السلوك بالمزاج و عدم الإنتصار علي النفس
.. إنت ماشي حسب مزاجك مش قادر تكسر الروتين
مش قادر تكسر مزاجك مش قادر تنتصر علي نفسك وعلي أنانيتك وعلي رغباتك و إتجاهاتك وميولك اللي تقدر تستغني عنها و إستغنائك عنها هايخليك خفيف وهايدفعك للامام .

4) (انا مش جعان)🤗
فيه خطوة مهمة جداً في رحلة التغيير .
. عدي بيها بطل الفيلم ودي من أصول الحياة الروحية
.. ان مهم الانسان ياخد فترة يختلي بيها بنفسه يفصل عن كل العلاقات و الأعمال وحتي المستلزمات الشخصية ..
والهدف ان الانسان يركز مع نفسه ومع ربه ويراجع حساباته
ويكتشف نفسه .. هو مين ؟ ويكتشف قوته ..
قد ايه جواه طاقة جبارة مستخبية ! .
. يعالج عيوبه ويشوف مميزاته بوضوح .
. للاسف فيه أشخاص بيهربوا من اللحظة دي
وبيخافوا من مواجهة نفسهم فبيلجأوا لدخول في علاقات متعددة
او قصص حب او شغل مكثف أو أي حاجة تشغلهم
عن انهم يكونوا مع نفسهم فترة ..
وفي الحقيقة ان ده بيكون زي المخدر بينسي الانسان للحظات لكن نتايجه خراب لحياته .. لكن المرحلة دي كانت نقطة تحول
وتغيير حياة بطل الفيلم .

كل اللي حوالين مجدي بطل الفيلم
ما اتجمعوش حواليه وعينيهم مليانة لهفة وحب الا لما انتصر علي نفسه ونجح وشافوه بيعمل شئ جديد في الحياة ..
وهنا نستنتج ان " ربنا بس اللي هايحبك حب غير مشروط .. لكن الناس هاتحبك اكتر حسب مدي تأثيرك " .. علشان كدة مهم تتغير وتتطور من نفسك باستمرار علشان نفسك و حياتك يبقي ليها معني أكتر من ان الناس تحبك .