[walaa farouk]

لو طلبت من الله نعم كتيرة ، اول حاجة تطلبها "نعمة الكلام" ..
و حقا قال الكتاب "في البدء كان الكلمة" (يوحنا ١ : ١) ..

ليه ؟؟
لان كل معاملاتك و علاقاتك و صداقاتك و رزقك و بيتك و خدمتك و مستقبلك مرتبط "بجمال و حسن اختيار كلامك" ..

مفيش حاجة اسمها "بس طيب ، و ما تاخدش علي كلامه" ، لان الكلام صورة العقل و أيقونة الشخصية ..

كل خسايرك بسبب كلامك، و كمان كل أرباحك بسبب كلامك ..

فيه كلمة تقوم علاقة و كلمة تهدمها بالكامل و تجيب عاليها واطيها ..

يمكن الناس تفوت لك كام مرة ، بس بعد شوية ح تكتشف انك بتخسر كل اللي حواليك بسبب كلمة عصبية او استهزاء او قلة كرامة ..

و اوعي تفتكر ان الناس اللي قلبها طيب دي بتنسي لك ، هي بتفوت لك بس علشان "المركب يمشي " .. لكن ربنا عالم باللي حصل جواهم من وجع و جروح و ندبات و نار..

و اللي زاد انك تدب الكلمة ، و تجرح الناس بسكينة تلمة و مش باين عليك اي ندم او تراجع ؛ ده مرات تعمل نفسك انك زعلان ان الناس فهمتك غلط و ما فهموش قصدك الطيب و نيتك البيضا !!
و الأخطر ان لما حد يعاتبك تكب علي جروحه خل و تحرقه بغضبك : ازاي يجرؤ انه يطلعك غلطان ، او يخطر علي باله انه حتي يعاتبك بكل أدب..

حاسب علي كلامك بدل ما يجيلك يوم تخسر اغلي الناس و تلاقي نفسك وحدك ، مش سامع غير نفسك ..

ده ح يجي لك يوم و مش ح تبقي مستحمل نفسك اللي سببتلك كل الخساير دي ، و تعيش معاها وشك في وشها و أحيانا قفاك في قفاها ، لا طايقها و لا طايقاك !!