[walaa farouk]

هو الحلو بيكمل ؟

اتعودنا نقول "الحلو اللي ما بيكملش" ..

جاب في الثانوية مجموع كبير بس ما لحقش الكلية اللي نفسه فيها ..
اشترينا شقة حلوة بس طلعت اوضها ضيقة ، أو بعد ما اتعاقدنا لقينا واحدة أرخص..
لقينا القماش بس ما لقيناش اللون اللي بندور عليه ..
بعض ما حجزنا قاعة الخطوبة لقينا واحدة اقرب و أرخص..
الولد اللي حبيته طيب و متدين و شهم بس مش غني ..

اللي بيخللي الحلو حلو، نظرتك انت ، رضاك، و فرحتك باللي ربنا اداهولك..

الحلو بيكمل "بالرضي" ، و بفرحة القلب باللي بين إيديك..

انت بس تصلي و تمشي في خوف ربنا ، و تجتهد علي قد ما تقدر ،
و تفرح باللي جالك ، و ح تلاقي كل حاجة تحلو في عينيك..

التفكير في اللي مش عندك مرار ، و الندم علي الفرص اللي راحت منك مرار المرار
، و المقارنة باللي عند غيرك أمّر من الكل ..

اصل العين مش بتشبع بكتر اللي عندها ، بتشبع بالرضي حتي بالقليل ..
و الرضي دي نعمة كبيرة بيديها ربنا للي بيشكروه علي عطاياه ،
و بيعرفوا يفرحوا باللي بين أيديهم..

الرضي يخللي الفقير اغني من اي غني ،
و فرحان اكتر منه حتي لو اللي عنده قليل جدا ..

الرضي بيخللي الحلو يكمل ، و يبقي أحلي حاجة في الدنيا ..