منتدى الفرح المسيحى - آفة الإنسان اللسان

آفة الإنسان اللسان ..

https://upload.chjoy.com/uploads/165495115736121.jpg

هو بيت الداء و اصل كل بلاء..
مش لمجرد لفظ اتقال ، ده لان الكلام عصارة الفكر و انعكاس للقلب و مرآة للنفس ..

فيه ناس بلوتها فى لسانها : شتيمة و اهانة و تنمر و إدانة و قسوة .
الملخص "لسانها متسلط عليها" ، و سر كل بلاويها !!

و ما حدش يقول "بس قلبها ابيض" ابدا !! لو قلبها ابيض يبقى لسانها لازم يبقى ابيض ، و الا نشتم و نقول كنت
" باهذر" او ندين و نقول " ما قصدتش " او نتطاول و نقول "معلش" ..

و برضه ما حدش يقول "اصل انا صريح" و يبهدل الناس و الا تبقى صراحة جارحة ..
الصراحة معاها أدب و احترام و كياسة و ذوق .. الصراحة اللي تحبب الناس فيك و فى كلامك تبقى صراحة صالحة ..

و فيه ناس تانية ربنا باركلها فى لسانها ، بينقط سكر ، ما يعرفش العيبة، و ما يطلعش غير كل بركة و ما يقولش كلمة تزعل حد ابدا ..
ناس قلبها حلو و كلامها احلى ، من كتر حلاوته ما تبقاش عاوزها تبطل تتكلم..
ناس الياسمين مستلف منها ريحته ، و العسل مستلف منها طعمه ..
ناس بطعم السما و طلة الورود ، مريحة زى النسيم العليل ما يخفف عنك عناء النهار ..
ناس ربنا خللى لسانها مصنع حب للكل و طاقة فرح للدنيا ..