منتدى الفرح المسيحى - ٧ اسباب علشان ما تخسرش حد و لا تعادي حد

https://upload.chjoy.com/uploads/159411393299611.jpg

١- روحي : المحبة تكسب الكل ، و بنعامل الناس بنفس الحب اللي ربنا عاملنا بيها مهما كنا وحشين ..

٢-خدمة و شهادة : بتشهد عن أخلاقك و مبادئك اللي بيها بتعلن للناس عن ربنا اللي جواك و تكسبهم للسما ..

٣-تجنب الاذي : الشر من صفاته انه لما بيتساب بيتكاثر .. اوعي تكسب عداوة حد انت ما تعرفش ممكن عداوته و غله توصل معاك فين ، إهانة و شتايم و فضايح و خناقات و يمكن انتقام و قضايا ..

٤-الايام دوارة : و المثل بيقول " اللي ما تحتجش وشه اليوم بكره تحتاج قفاه " ..
ممكن اللي خسرته و عاديته تلاقيه طالعلك في حتة انت مش متوقعها و تلاقي نفسك مضطر تتعامل معاه أو مزنوق له في طلب مفيش قدامك غيره ..

٥- راحتك النفسية : علشان تعرف تركز في شغلك و تعيش يومك مع عيلتك و تعرف تنام آخر اليوم نومة حلوة و عقلك هادي من غير صراعات و لا خوف من الشر المتبادل..

٦-اللي جربوا قبلك العداوة خسروا : مفيش مشاكل من غير ضرايب نفسية و مادية و معنوية فادحة ، و مفيش عداوة وصلت لخير او سلام أو مكسب حتي لو كسبت بعض الجولات ..
الصراعات آخرتها خساير مهما مخك قالك انك ح تكسب كرامة أو مواقف ..
ح تبهدل مشاعرك ووقتك و صحتك في الشقاقات و ترجع في الاخر تقول "الطيب احسن" ..

٧-ارباح : اكسب صحتك و حافظ علي سلامة قلبك و اعصابك ..
و اكسب كمان مواقفك قدام الناس ؛ الناس لو شافوا عنفك و تبادل الشر بالشر يمكن في وشك يوافقوك ، لكن عمرهم ما يحترموك..
يكبروك لو لقوك خلوق مؤدب صاحب المواقف السامية و اخلاق راقية و يتكلموا عليك في غيابك أحلي كلام ..

ملحوظتين:

الاولي : عارف ان فيه ناس مهما حاولت معاهم مش ح توصل لحاجة .. لو هم عاوزين يخسروك ماشي بس اوعي تخسرهم أو تعاديهم.. ادعي لهم و ابعد عنهم ..

التانية : عامل الناس بأخلاقك مش باخلاقهم و ما تستناش منهم رد الحب بالحب.. كفاية رضي ربنا عليك و رضاك عن نفسك ..

لا يغلبنك الشر بل اغلب الشر بالخير.. (رومية ١٢: ٢١)