منتدى الفرح المسيحى - افحص طلبك في نور ربنا ..

https://b.top4top.net/p_6857e1751.jpg

طلبت من ربنا حاجه ..
و قعدت اصلي فيها فوق السنه و شهرين ..
و دخلت بسببها في صراعات كتير مع ربنا ..
لحد ما هو قرر يقول لأ بطريقته بعد ما ورّاني كمّيه الشر المستخبّي في طلب بطلبه بنيّه صالحه ..

طلبت من ربنا حاجه ..
لانّي محتاجاها فعلاً ..
و مش عارفه تحصل ازاي ؟
مجرّد بس ما قولتله : انت ابويا ، عولني !
سبت الطلب الصبح
استجاب في نفس اليوم بليل !

هو هو نفس الإله ..
اللي ممكن يخلّي الانسان يخبط دماغه في الحيط
عشان مش فاهم مبيستجيبش كل ده ليه ..
ممكن برضو يخلّي الانسان مذهول من سرعه استجابته !
الفكره كلها في :
حقيقة اللي احنا بنطلبه ايه ؟
و بنطلبه ليه ؟
لو مبناخدش ..
يبقي غالباً بنطلب رديّاً عشان نُنفق علي لذاتنا
لان الطلبات الصالحه فعلاً ربنا بيحققها في وقت اسرع جداً مما نطلب او نفتكر !

لو بقالك كتير مبتاخدش طلبك
افحصه في نور ربنا ..
غالباً نور ربنا هيكشفلك في طلبك ، و ان بدا صالح ، شر مريع !
اللّه اب صالح
اب بمعني الكلمه
لو قولتله هات سكينه
مش هيديهالك
و لو حاولت تاخدها عافيه
هيضربك علي ايديك و هيسيبك تتفلق ...

بينما لو قولتله : هات حضن
هينطرك زي ما بنعمل مع الاطفال لفوق
و يخليك تنزل سقوط حر في حضنه تغرق فيه..
لو قولتله جعان ، هياكّلك عسل
هيشبّعك بمن السما لو منافذ الارض فضيّت ..
اللّه صالح
و الطلب الصالح مبياخدش عنده اكتر من الوقت اللازم للإمضا!