زمنك ايه؟ ⏰

[walaa farouk]

- انت عايش في أي زمن ؟ ممكن ألاقي واحد يقول :
ايه السؤال ده ؟ كلنا عايشين في الحاضر .
. هو فيه حد عايش في الماضي مثلا ؟

- احنا عايشين بأجسامنا في الزمن الحاضر ..
لكن عقولنا مش مرتبطة بالزمن ده بشكل دائم.. عقلك بيطير للماضي أحيانا ويسافر للمستقبل أحيانا لكن مش عايش في الزمن الحاضر طول الوقت
- عقلنا بيسافر للماضي.. ممكن عشان يجيب ذكريات سعيدة أو دروس مستفادة من تجارب ..لكن مش دي المشكلة خالص .
. المشكله بقي في اللي جاي

- واحد فشل في علاقة عاطفية من سنتين .
. و متضايق لحد دلوقتي.. طيب لو بصيت علي أحواله دلوقي هتلاقي مافيش حاجه يتضايق منها .. اللي مضايقه هو حاجه في الماضي مش في الحاضر ... عقله بيسافر كتير للماضي .. ممكن عشان يجيب ذكريات تعيسة أو إحساس بالألم .. مع ان الحاضر ممكن يكون كويس , بس العقل عايش في الماضي و معتبره حاضر

- ممكن كمان عقلنا يسافر للمستقبل يعني تسرح
وانت مع صحابك و تلاقي نفسك بتخطط لمشاوير بكره و هنا مافيش مشكله لكن ..
- ممكن تسرح في المستقبل و تلاقي نفسك خايف من نتيجه الامتحان اللي هيظهر بعد شهرين... طيب انت امتحنت خلاص و مافيش في ايدك حاجه تعملها عشان تغير النتيجه! بس بردو خايف..
. او عمال تفكر انك لما تتخرج مش هتلاقي شغل؟ عرفت منين؟!
- ممكن تكون قاعد بجسمك في الحاضر
و عقلك بيخترع اسوأ السنريوهات الممكنه و يخوف بيها نفسه!!

طيب اعمل ايه عشان اعيش في الحاضر:
- عبر عن مشاعرك سواء حزن او خوف سواء تخص الماضي او المستقبل لكن بلاش تفضل طول الوقت تتكلم و تفكر فيها
- كل مادماغك تسرح في افكار او ذكريات ..طفش الفكرة ..فكر هنا و دلوقتي..او فكر في شيء تاني
- لو لقيت نفسك مش قادر ماتفكرش في الموضوع ..خصص ساعة في اليوم و اجل كل التفكير في للساعة دي لكن ده مايكونش كل يوم
- تابع الأحداث اللي موجوده حواليك و اتعلم تختار احداث ايجابيه تركز عليها اكتر
- اكسر كل يوم عادة صغيرة بسيطة باستمرار ..لو متعود تشرب شاي بعد الاكل ..اشربه قبل الاكل ..متعود معلقتين سكر خليها واحدة
- حوّل احداث الماضي لخبره تستفاد منها و حوّل مخاوف المستقبل لخطه عمليه تهزم بيها مخاوفك
-كافئي نفسك في اليوم اللي ماتفتحش فيه الموضوع
- اتعلم مهارات جديده و غير روتين يومك

خلي بالك
الزمن الحاضر مافيهوش حاجة بتضايق .. اللي مضايقنا طول الوقت حاجة خلصت وعدت ، أو حاجة منتظرنها وممكن متحصلش أساسا ..
اللحظات السلبية قليلة جدا وبتعدي .. المهم إننا مانرجعش ليها ونسيب الحاضر ... عيش زمنك الحقيقي و استمتع بيه