هو أنت عايز تبقى خادم مسيحي بجد؟

[walaa farouk]

-



أنا مش عايز اتغرب واتشحطط في الخدمة، عايز استقرار وهدوء.
+ شيل يابني إبراهيم من القايمة.
- كمان مش عايز أبدأ كده صغير،
أقعد بقى سنين ما بين دعوة ربنا ليا لحد ما أبقى مشهور كده وكبير،
وسنين تعب وكده، لا مش عايز.
+ مفيش مشكلة، احذف كمان معاك داود النبي.
- من فضلك كمان عايز أشوف دايمًا ثمار،
يعني الخدمة بتاعتي كل يوم تفرحني بثمر، لكن أقعد فترة بدون ثمر لا ده صعب.
+ممممم، إبراهيم، داود، معاك كمان إرميا.. شيله!
- ولو برضه ياريت أبقى في مكانة أعلى وأعظم من إللي بخدمهم،
يعني أنا عندي استعداد أخدم ناس فقرا وكده، بس أنا معلش مبقاش زيهم..
+ فاهمك فاهمك، هما يتوهوا في البرية لكن أنت توصل بطيارة، موسى كمان.
- رفاهية بقى، رفاهية كتير.. لا مشقة في الخدمة، ولا أتعاب جسدية،
مهو مفيش خادم هيتعب في جسده أكيد، ولا محاربات ولا ناس تتكلم عليا،
خصوصًا دي، محبش أنا حد يتكلم عليا.
+ آآه بولس يعني، مش عايزه ده كمان.. ماشي هانت.
- طبعًا عايز تلاميذ، يقولولي "يا قائد" كل شوية.. لما يشوفوني قدام الناس يكبروني
ويعلوني، يبقوا عايزين يشيلوني من الأرض كده، يوطوا يغسلولي رجلي قدام الناس.
+ أوبااا، هنشيل كمان الرب يسوع نفسه..
معلش عندي سؤال، هو أنت عايز تبقى خادم مسيحي بجد؟
- آه، قائد يعني كده في الكنيسة.. بس إتوصى!