الفكرة مش بلوك !

[Rena Jesus]

الفكرة مش بلوك !

الفكرة اني مش قادرة مفتحش صفحتك كل يوم ،
مش قادرة أشوف مين عاملك لايك ومين معلقلك ،
مش قادرة أراقب كل كلمة بتقولها ف كومنت وكل كلمة بتتقالك ،
الفكرة اني أضعف من اني أقاوم قلبي !

حاولت ..
حاولت كتير أقول عادي ومش هتأثر .. بس بتأثر ،
حاولت أقول كل شئ انتهي بس فعلا مش قادر ينتهي جوايا ،
حاولت أعيش حياتي بس هي فعلا واقفة من بعدك !
حاولت أنام من غير ما أفكر فيك .. معرفتش

تعبت ..
تعبت من كل كلمة قولتهالي ف يوم ولسة بترن جوايا ،
تعبت من كل حاجة ضحكت عليها معاك ف يوم وبتوجعني دلوقتي ،
تعبت من الشوارع اللي مشينا فيها سوا ، من الأماكن اللي جمعتنا ، من الأحلام اللي عشنا فيها قبل ما تتحقق ، من كل أغنية قولتلي اسمعيها دي مني ليكي ..
تعبت من كل حاجة !

صعب ..
صعب افتح صفحتك كل يوم وأنام معيطة ،
صعب أنام ع صورتك وأصحي ع صورتك وأبقي عادي ،
صعب أتخيل انك بتحب غيري !

تفتكر ..
تفتكر اني مش بحتاج أكلمك ؟!
تفتكر اني مش محتاجة أقولك وحشتني ؟!
تفتكر ان اسمك اللي ف الشات ده مش بيخليني أضعف ،
وأبقي عايزة أجري عليك وأقولك يلا ننسي كل اللي فات ؟!
يلا نبتدي من جديد ؟!

صدقني مش عايزة أرجع ألف تاني ف نفس الدايرة وأتكسر !
صدقني أنا بجبر روحي تبعد عن دايرتك بالعافية ،
لأنها مش راضية تبعد عنها بالذوق ، وأنا تعبت !

يمكن لما أبطل أعيط ..
يمكن لما اتعود علي انك مش موجود ف دايرتي ،
يمكن لما قلبي يسلم بحقيقة الواقع ..
يمكن لما أبطل أفتكر كلامك وأحلامنا وكل حاجة كانت بينا ..
وقتها بس أشيل البلوك

أشيل البلوك اللي حطيته لأن قلبي لسة بيدق ليك انت وبس ،
أشيل البلوك اللي حطيته لأني بحبك ، ومش قادرة أتقبل فكرة غيابك ..
البلوك دليل ضعف قلبي وهشاشة روحي ف مواجهة واقع الفراق !