٤ دروس من اية جميلة

[walaa farouk]

«اجلس عن يميني حتى أضع أعداءك موطئا لقدميك»

لاهوتيا الآية دي كتبها داود النبي بروح النبوة عن السيد المسيح ..

و تأمليا لنا فيها لحياتنا الشخصية دروس جميلة ..

1-اجلس : يعني اطمن ، سيب لي الموضوع ، دي مسؤوليتي مش مسؤليتك..

2-عن يميني : يعني مكان قوتي و عزة جلالي
، يعني بلاش قوتك اللي ممكن تتعبك و توقعك في مشاكل ، و اتكل علي حكمتي و قدرتي ..

3-حتي : يعني الموضوع ح ياخد شوية تدبير ووقت
، يعني اصبر و ما تستعجلش و انتظر و ح تشوف الحل بنفسك في الوقت المناسب..

4-اضع اعداءك موطئ لقدميك : يعني الحل ح يجي لحد عندك
و ممكن من غير حتي ما تحرك رجليك "عند موطيء قدميك" ..

و يعني اعداءك ح ينهزموا اكيد بس بطريقتي ، انا اللي ح "اضعهم" ..

ممكن ابددهم و ابيدهم لك طبعا و اكسر لك كبرياءهم و غرورهم ، و طرقي كتير ..

لكن ممكن اغير قلبك نحوهم أو قلبهم نحوك و القلوب تتصافي ..

و ممكن اخلي شرهم يتحول لخير و يندموا علي اللي عملوه فيك
لما يشوفوا أن حقدهم عليك زود نجاحك ..

و ممكن اخللي الناس تدافع عنك و تاخد لك حقك منهم تالت و متلت
يمكن من غير ما تسعي و لا تطلب ..

و ممكن كمان اصرفهم من حياتك بهدوء و لا كأنك تعرفهم و الهيهم بعيد عنك بطريقتي..