خلونا نغير المصطلح ونقول " لقاء صالونات "
وبكده هنقدر نقيمه بشكل أفضل
وبكده هيكون الصالون مجرد مكان لأول لقاء ..
زيه زي باقي الأماكن اللي بتشهد شرارة أول لقاء في قصص الحب سواء كانت علي الفيس بوك او النادي او في رحله او فرح .... الخ
كان للقاء مشاعر ايجابيه يبقي نتجوز ونسميه " جواز عن قصة حب "
وليس " جواز صالونات "
ولو مكنش يبقي كل واحد يروح لحاله
احنا مشوهين المصطلح ومحملينه فوق طاقته
ميزة لقاء الصالونات عن قصص الحب التقليدية
ان العقل هو اللي بيدي اشارة البدء
وبكده بتكون اشارة حكيمة مقتنعه تماما بخوض التجربة والسماح للمشاعر تاخد فرصتها
بالمقارنه بين قصص الحب التقليدية اللي بيكون العقل فيها ملغي وبتكون الكلمة الأولى والاخيرة للقلب فقط ،
اللي للأسف مبيشوفش حقايق كتير وبالتالي لما العقل يفوق من الغيبوبه بيكتشف انه اتورط ومش بعيد يلاقي نفسه اب لأربع عيال
مفيش حاجه اسمها جواز صالونات
فيه حاجه اسمها انا قابلته وارتحت وموافقه اني اتجوزه
او انا قابلته ومرتحتش ومش هكمل معاه
غير كده يبقى قلة عقل ..
مايكل سامى
