مجرد كلمة

[walaa farouk]

"الموت والحياة فى يد اللسان" بكلمة تقدر تقوم حروب أو تهديها، تخلى بنى آدم فى قمة ثورته يهدا أو العكس ممكن تحوله من هدوءه إلى بركان من الغضب. الكلمة تأثيرها كبير واستمرارها فى الذاكرة طويل أوى، بتكون عاملة زى اللصق اللى مش بيطلع خالص ولو طلع بيسيب شوية آثار ليه.
واحنا صغيرين اتقال لنا شوية كلام كتير منه الإيجابى ومنه السلبى، ولو كم السلبى كان اكتر من الإيجابى بيخلى صورة الإيجابى جوانا باهته وكأنها مش موجودة! الكلمة السلبية بتهد جوانا كتير أوى. مهما كانت امكانياتنا وقدراتنا بتفضل حاجة جوانا مفرملانا ومقيدانا عن إننا ننطلق فى الحياة ونبين كل امكانياتنا ونتستمتع بيها. كلمة "إنت فاشل" صداها بيرن مع كل فشل تانى ومع كل نجاح كمان. فيه ناس الكلام السلبى بيكون وكأنه "النبؤة ذاتية التحقيق" يعنى بيصدفها تماماً وكأنها دى حقيقته فعلاً وبيعمل كل حاجة فى الحياة وهو مدفوع بقوة الكلام السلبى اللى سمعه وتكون النتيجة انه يتحقق تماماً كما لو كان صح!
اغلب التشوه النفسي اللى جوانا اتكون نتيجة كلام سمعناه خاصة من اهلنا او الدوائر القريبة مننا، ولأننا بنكون صغيرين وهما بالنسبة لنا كُبار فأكيد فاهمين وعارفين اكتر مننا واكيد برضه اللى بيقوله صحيح! وهنا المشكلة، إننا مش بنفكر فى مدى صحة الكلام ده. اللى سمعت "أنتى اوحش بنت فى الكون" صدقت انها وحشه وانها مش هتكون محبوبة لأنها وحشة، وممكن لما تكبر تعمل أى حاجة علشان تحس للحظة انها مقبولة ومحبوبة من حد!
اللى سمع "إنت مش فالح ولا هيكون منك رجا" وصدق الجملة دى، هيفضل وقت كتير أوى بيحاول يثبت لنفسه وللى حواليه إنه مش فاشل وان ممكن يكون منه رجا فى يوم من الأيام حتى لو بطرق مش صح. حتى لو تنافس مع كل اللى يقابلهم علشان يثبت انه كويس!
الكلام اكثر الأسلحة إيذاءاً للنفس البشرية. ناس كتير بتبان قوية من بره لكن أول لما بتتكلم عن وجع جواها بيكون انها فاكرة كل الكلام السلبى والهدام اللى اتقالها من وهى صغيرة جداً!
عايزة اعتذرلك بالنيابة عن كل شخص كان ليه بصمة جواك بكلمة سلبية اتقالتلك، وإن لو كان فى صعوبة فى نسيان الكلام ده فعلى الأقل وقف تأثيره عليك وعلى تصرفاتك.
اعترف وواجه انك موجوع وده حقك ومش ضعف، اطلب من الله يوضحلك حقيقتك وإنك شخص مميز فى نظر الله لأنه ببساطة مخلقش حاجة مشوهه. اكتشف امكانياتك ومهاراتك وقدراتك وحطها قدامك علشان هى دى الحقيقة، واعرف ان مفيش حد كامل، وانك مش مُطالب تكون كامل لأنك إنسان. ارفض كل كلام سلبى بيتلصق عليك، شيله حتى لو المك مكانه بعدها بفترة يمكن تلاقى آثار لكن مش وجع. خُد من نقطة ضعفك مكان للإنطلاق ولقوتك. ولأنك عارف تأثير الكلمة، فشجع كل اللى حواليك بكلام حقيقى وإيجابى فيهم. واقبل كمان وصدق كل كلمة حلوة بتسمعها.
إنت مش اللى قالوه عليك إنت صغير، إنت اللى بتعمله بمسئولية كاملة وإنت كبير.