بندق مع تيكا وزيكا (اسكتش راس السنة)

Marina Greiss · رقم المشاركة : ( 1 ) 20 - 07 - 2012, 09:45 AM

شخصيات العرض:-
بندق زيكا تيكا بابا نويل خادم

ترنيمة:سنة عدت من عمرى يا ربى طول الأيام شايفك جنبى

بندق : ايه ده .. محدش لسة جه .. هما كل مرة كدة ... انا زهقت ... كل مرة نتفق فيها نروح مشوار يتأخروا علىّ ... وفى الاخر يقولوا لى معلش يا بندق .. ما تزعلش يا بندق ... اعمل ايه؟ .. اعمل ايه؟
خادم : مالك يا بندق
بندق : انا زهقت يا استاذ ... كل مرة نتفق فيها نروح اى مشوار يتأخروا علىّ .. وفى الاخر يقولوا لى معلش يا بندق .. ما تزعلش يا بندق ... اعمل ايه معاهم
الخادم : هما مين دول يا بندق
بندق : اصحابى تيكا وزيكا
الخادم : طب ماهو ممكن يكونوا نسيوا
بندق : ده انا اكدت عليهم ان النهاردة بالذات لازم نتقابل .. غير كدة حد ينسى يوم زى النهاردة .. ده ما حدش فى الدنيا دى كلها يقدر ينسى يوم زى النهاردة
الخادم : اشمعنى النهاردة بالذات يعنى يا بندق
بندق : انت كمان يا استاذ مش عارف فيه ايه النهاردة
الخادم : قول لنا انت يا بندق
يدخل تيكا
تيكا : ايه ده؟ ... بندق ... انت هنا بتعمل ايه؟ ... انت مستنى حد
بندق : انت لسة فاكر تيجى يا سى تيكا ... بقالى ساعتين مستنيكم
تيكا : مستنى مين
بندق : مستنيك انت وزيكا
تيكا : ليه فيه حاجة؟
بندق : انت نسيت؟ انا مش اكدت عليكم وقلت لكم لازم نتقابل النهاردة
تيكا : خلاص يلا ننادى على زيكا علشان ييجى
الكل : يا زيكا ... يا زيكا
زيكا : ايه؟ فيه ايه .. بتنادوا على ليه
بندق : أنا مش اكدت عليكم يا زيكا اننا لازم نتقابل النهاردة
زيكا : ليه .. فيه حاجة
بندق : النهاردة راس السنة
الكل : راس السنة ... يعنى ايه راس السنة؟
بندق : فيه حد ما يعرفش راس السنة ... أنا هاقول لكم ... راس السنة يعنى سنة خلصت وسنة جديدة تانية جاية ... سنة بكل ايامها خلصت وايام تانية كتير جاية فى سنة جديدة
تيكا : أنا مش فاهم حاجة ... أنا كل اللى اعرفه انى انام بالليل واصحى الصبح اكل فول وطعمية ... واقعد العب طول اليوم لغاية بالليل اروح انام واصحى الصبح اكل فول وطعمية واقعد العب طول النهار والايام بتعدى
زيكا : يا راجل ... يا راجل ده اسمه كلام ... راس السنة يعنى النهاردة اخر يوم فى السنة وبكرة هتبدأ سنة جديدة ... علشان كدة احنا لازم نحتفل براس السنة وبالسنة الجديدة اللى جاية
بندق : ايوة كدة شايفين الكلام المظبوط ... احنا لازم نحتفل براس السنة
تيكا : ازاى يعنى ... يعنى ايه ... يعنى بدل ما ناكل فول وطعمية ناكل بطاطس وبتنجان يعنى ولا ايه؟
زيكا : لأ ... مش كدة افهم بقى ... يعنى نروح نركب عجل ونجيب بمب وصواريخ ... ونشرب حاجة ساقعة ... ونجيب بلالين وطراطير وزمامير ... مش كدة برضة يا بندق
بندق : ايه اللى انتو بتقولوه ده ... لأ مش كدة طبعا
الكل : امال ايه يعنى
بندق : أنا مش هاقول لكم ... أنا هنادى لكم على واحد كلنا بنحبه... بيجيلنا كل كل سنة كلنا فاكرينه مش كدة ... وهو اللى ها يقول لنا
الكل : مين ده يا بندق
بندق : راجل حلو خالص ... دقنه بيضا وكبيرة ... لابس هدوم حلوة لونها احمر
تيكا : ايوة صحيح وبيبقى معاه زمامير
زيكا : ايوة ومعاه كمان حكاوى كتير
الكل : يلا ننادى عليه
بندق : طب قولوا الاول اسمه ايه
الكل : بابا نويل
ترنيمة بابا نويل كلنا فاكرينك من سنة فاتت كنت هنا
بابا نويل : ازيكم يا حبايبى يا حلوين
زيكا : بابا نويل ... هات زمارة
تيكا : أنا عاوز طرطور
بندق : أنا عاوز حكاية حلوة
بابا نويل : حاضر هانفذ لكم كل اللى انت عاوزينه
بندق : فى الاول يا بابا نويل عاوزين نعرف يعنى ايه راس السنة ... يعنى ايه سنة فاتت وسنة جديدة جاية
بابا نويل : سنة فاتت ... يعنى سنة احنا عشناها بكل حاجة حلوة فيها وكل حاجة ضايقتنا فيها
زيكا : ويعنى ايه سنة جديدة
بابا نويل : يعنى لسة فيه ايام تانية لسة هانعيشها
تيكا : مش فاهم حاجة
بابا نويل : يعنى خلاص كبرنا سنة وبقينا كبار اكبر من السنة اللى فاتت ... وكمان ربنا ادانا سنة تانية نعيشها ونكبر اكتر واكتر
تيكا : طب خلاص ... ايه بقى لزمة الحفلة والكلام اللى انتوا بتقولوا عليه ده
زيكا : يا تيكا ... يا تيكا طبعا لازم نهيص ونلعب ونزمر ونفرقع بلالين ونركب عجل ونتفسح
بندق : لأ ... الاحتفال براس السنة مش كدة
الكل : امال ايه بقى يا سى بندق
بندق : قول انت يا بابا نويل
بابا نويل : الاحتفال عمره ما كان فسح ولعب وتنطيط وبس
الكل : امال ايه بس يا بابا نويل
بابا نويل : سنة عدت وخلصت المفروض اننا نشوف عملنا فيها ايه
الحاجات الحلوة اللى احنا عملناها نعملها كمان السنة اللى جاية اللى اداها لنا بابا يسوع ... والحاجة الوحشة اللى احنا عملناها فى السنة اللى فاتت نبطل نعملها السنة اللى جاية
تيكا : حاجة حلوة ... وحاجة وحشة ... وانا اعرف ازاى ... أنا مش فاهم حاجة خالص من اللى انتوا بتقولوه ده
زيكا : هو انت على طول كدة مش فاهم؟
بابا نويل : معلش يا زيكا احنا لازم نفهمه
تيكا : شكرا يا بابا نويل
بابا نويل : شوف يا سى تيكا ... فى اخر السنة احنا نشوف مثلا زعلنا مين مننا وزعلناه ليه وما نعملش كدة تانى ... وكمان نشوف ان كنا مش بنسمع الكلام نبدا نسمع الكلام ... وزى كدة مع كل حاجة وحشة كنا بنعملها ... والحاجات الحلوة اللى عملناها نعملها اكتر واكتر
بندق : ايوة يا بابا نويل فعلا السنة اللى فاتت أنا كنت مش بسمع كلام ماما فى كل الاوقات والسنة اللى جاية أنا هسمع كلامها على طول
بابا نويل : وانت يا زيكا
زيكا : أنا كنت بضايق اصحابى وازعلهم منى ... لكن من بداية السنة الجديدة أنا مش هزعل اصحابى منى تانى
بابا نويل : وانت يا تيكا
تيكا : أنا ؟ ... أنا ايه؟ ... أنا مش فاهم حاجة
زيكا : يوه يا تيكا ... يا بنى بطل كلمة مش فاهم دى
بابا نويل : يا تيكا قول لنا عملت ايه مش كويس فى السنة اللى فاتت وهاتعمل ايه فى السنة الجديدة
تيكا : مش فاهم ... قصدى يعنى ان أنا كنت دايما مش بعمل اى حاجة وسايب اخواتى يعملوا كل حاجة ... لكن مع بداية السنة الجديدة أنا هساعد اخواتى وهعمل كل حاجة معاهم
بابا نويل : طب دلوقتى ها نعمل ايه؟
تيكا : مش فاهم ... قصدى قول انت يا بابا نويل
بندق : أنا اقول يا بابا نويل؟
بابا نويل : قول انت يا بندق
بندق : احنا كنا متفقين نروح دلوقتى للكنيسة علشان نصلى فى اخر السنة ونستقبل السنة الجديدة جوة الكنيسة
بابا نويل : فعلا هو ده الاحتفال الحقيقى براس السنة ... تروحوا تبدأوا السنة الجديدة جوة الكنيسة مع بابا يسوع ... وتصلوا ليه وتقولوا له
الكل : ايوة بقى نقول له ايه؟
بابا نويل : تقولوا له يا بابا يسوع سامحنا على كل الحاجات الوحشة اللى احنا عملناها فى السنة اللى فاتت ... وساعدنا نعمل حاجات حلوة كتير السنة اللى جاية ... انت تفرح بيها
بندق : أنا هقول له يا بابا يسوع أنا هسمع كلام ماما ومش هزعلها منى تانى
زيكا : وأنا هقول له يا بابا يسوع أنا هبطل ازعل اصحابى منى تانى
تيكا : وأنا هقول له يا بابا يسوع أنا هساعد اخواتى فى كل حاجة يطلبوها منى
بابا نويل : برافوا عليكم يا ولاد ... يللا بسرعة اجروا ع الكنيسة قبل ما تتأخروا
بندق : لأ لسة يا بابا نويل
زيكا : صحيح فين الهدايا الحلوة بتاعتك يا بابا نويل
تيكا : أنا عاوز بالونة كبيييييييرة خالص
بابا نويل : خلاص روحوا انتوا الكنيسة وانا هاجيب لكم هداياكم لحد البيت
الكل : هيه شكرا يا بابا نويل ... يللا بسرعة ع الكنيسة
ترنيمة سنة عدت من عمرى يا ربى طول الأيام شايفك جنبى.

Mary Naeem · 20 - 07 - 2012, 10:19 AM

شكرا على المشاركة
ربنا يفرح قلبك

Marina Greiss · 20 - 07 - 2012, 07:58 PM

ميرسى يامارى على مرورك الجميل