انطوان كلوت

[joy]

انطوان كلوت

(بالفرنساوى : Antoine Barthelemy Clot ) المشهور ب كلوت بيك او كلوت بيه (7 نوفمبر 1793 ، جرينوبل - 28 اغسطس 1868 ، مارسيليا) كان طبيب فرنساوى اتولد فى " جرينوبل " فى فرنسا سنة 1793 و عاش فترات طويله من حياته في مصر بعد ماطلب منه محمد على باشا تنظيم الإداره الصحيه للجيش المصرى ، وبقى رئيس أطبا الجيش. اخد لقب " بك " كتكريم لجهوده و صبره. الشغل اللى عمله كلوت بيه فى مصر كان ضمن النهضه العلميه اللى حصلت فى كل المرافق الاجتماعيه و الاقتصاديه و الاصلاحات اللى عملها محمد علي فى مصر. كلوت بيه رجع لمارسيليا سنة 1849 و مات هناك سنة 1868.

مدرسة الطب

أسس محمد على مدارس كتيره للطب أولها مدرسة الطب الانسانى فى ابو زعبل سنة 1827 ، و اتولى ادارتها الدكتور كلوت بك. مدرسة ابو زعبل بتعتبر اول مدرسة طبيه فى العصر الحديث فى الشرق كله. معظم الاساتذه اللى درسو فيها كانو فرنساويين او اسپان او طليان. الكتب و المراجع اللى استعملوها كانت فرنساويه و كانت المحاضرات بتترجم للعربى لتدريس التشريح والجراحه و الامراض الباطنيه وعلم الصحه و الصيدله و الطب الشرعى و الفيزيا و الكيميا ، و اتبنت جنب المدرسه دى مدرسه تانيه خاصه بالصيدله ، كان بيتبع مدرسة الصيدله جنينه لزرع كل النباتات الطبيه. و اختارو للمدرسة 100 طالب كان كل واحد فيهم بياخد مرتب شهرى قيمته 100 قرش بالاضافه للاكل من الأزهر.

مستشفي ابو زعبل كانت بتضم 720 سرير و بعدين نقلو المدرسه و معاها المستشفي من ابو زعبل للقاهره سنة 1837 و اختارو القصر العينى عشان يكون المقر الجديد.


مدرسة الدايات

اتأسس قسم للولاده و مدرسه للدايات فى المستشفى بس كان فيه صعوبه كبيره فى انهم يلاقو طالبات مصريات للمدرسه و اتغلبت الحكومه على المشكله دى بانها اشترت 10 بنات من الحبشه و السودان ( من سوق العبيد ) و دخلتهم المدرسه و كمان ضمت للمدرسه اتنين من الاغوات ( المظ و سليمان) من القصر اللى فى القلعة ، و فى سنه 1835 ضمو 10 جوارى تانيين ووصل عدد الطالبات لـ اتنين و عشرين و بعدين زاد العدد بتدخيل عشر بنات يتما صغيرين فى السن كانو عيانين و دخلو المستشفى للعلاج و بعد ما خفو ماحدش طلبهم من قرايبهم فدخلتهم الحكومه لمدرسة الدايات.

كتب كلوت بك مؤلفات طبيه كتيره ، وكان الطبيب محمد الشافعى مترجمه الدايم.

كتبه الطبيه بالعربى
'"بواكير الطب الحديث" من اهم الكتب الطبيه عشان فيه معلومات في مختلف فروع الطب
"القول الصريح في علم التشريح", اتطبع سنة 1872
"مبلغ البراح في علم الجراح"
"نبذه عن التشريح المرضى" اتطبع سنة 1876
كتبه الطبيه بالفرنساوى
Relation des epidemies de cholera qui ont regne de l'Heggaz, a Suez, et en Egypte (1832)
De La Peste observe en Egypte (1840)
Apercu general sur l'Egypte (1840)
Coup d'oeil sur la peste et les quarantaines (1851)
De l'ophthalmie (1864)