الشيبسي

[sama smsma]

تنويعات علي اوتار انجيل مرقس
نغمة 8.. تتمة الاصحاح التاني
الشيبسي!!!



18 وَكَانَ تَلاَمِيذُ يُوحَنَّا وَالْفَرِّيسِيِّينَ يَصُومُونَ، فَجَاءُوا وَقَالُوا لَهُ: «لِمَاذَا يَصُومُ تَلاَمِيذُ يُوحَنَّا وَالْفَرِّيسِيِّينَ، وَأَمَّا تَلاَمِيذُكَ فَلاَ يَصُومُونَ؟»
يمكن دخل تلاميذ يوحنا شوية غيرة لما شافوا معلمهم الناسك يسجد قدام المسيح و يقدم ليه تلاميذه مع ان المسيح في نظرهم مش بنسك يوحنا و لا الزم تلاميذه بالنسك.. كمان السجادة انسحبت خالص من الكتبة و الفريسين و شعبية المسيح في زيادة... تقدر تقول سؤال مش خالص النية بس المسيح نقل الموضوع في مفاهيم جديدة لما جاوب



19 فَقَالَ لَهُمْ يَسُوعُ: «هَلْ يَسْتَطِيعُ بَنُو الْعُرْسِ أَنْ يَصُومُوا وَالْعَرِيسُ مَعَهُمْ؟ مَا دَامَ الْعَرِيسُ مَعَهُمْ لاَ يَسْتَطِيعُونَ أَنْ يَصُومُوا.
20 وَلكِنْ سَتَأْتِي أَيَّامٌ حِينَ يُرْفَعُ الْعَرِيسُ عَنْهُمْ، فَحِينَئِذٍ يَصُومُونَ فِي تِلْكَ الأَيَّامِ.
ما قللش من قيمة الصوم خالص و لا اعلن امتناع تلاميذه عنه مطلقا لكنه نقل القصة للتمتع بالعريس السماوي.. كل اصوامنا لو ما بتقربناش من ربنا و تحرر الجسد علشان يتمتع بالعريس تبقي اصوام ناقصة و بلا قيمة..



21 لَيْسَ أَحَدٌ يَخِيطُ رُقْعَةً مِنْ قِطْعَةٍ جَدِيدَةٍ عَلَى ثَوْبٍ عَتِيق، وَإِلاَّ فَالْمِلْءُ الْجَدِيدُ يَأْخُذُ مِنَ الْعَتِيقِ فَيَصِيرُ الْخَرْقُ أَرْدَأَ.
نقلهم لفكر جديد ولاد ربنا حيصوموا بيه لما يتم الفداء.. كل الصوم كان مجرد ترك لاكل لكن بعد نوال الروح القدس بقي انعاشا للقلب و الروح و تمتع بربنا و مقاومة الخطية .. كان قصد ربنا مش حيفيد تلاميذه يصوموا و هم لسه في التوب القديم كانه بيرقعه بحتة جديدة لكن التوب مش حيستحمل اصلا...



22 وَلَيْسَ أَحَدٌ يَجْعَلُ خَمْرًا جَدِيدَةً فِي زِقَاق عَتِيقَةٍ، لِئَلاَّ تَشُقَّ الْخَمْرُ الْجَدِيدَةُ الزِّقَاقَ،

فَالْخَمْرُ تَنْصَبُّ وَالزِّقَاقُ تَتْلَفُ. بَلْ يَجْعَلُونَ خَمْرًا جَدِيدَةً فِي زِقَاق جَدِيدَةٍ».
الصوم بعد نعمة العهد الجديد له مذاق مختلف.. له بركات مختلفة و هو ده اللي دفع القديسين للصوم و النسك للتحرر من ضيق الجسد و انطلاق الروح في جسد خفيف..



23 وَاجْتَازَ فِي السَّبْتِ بَيْنَ الزُّرُوعِ، فَابْتَدَأَ تَلاَمِيذُهُ يَقْطِفُونَ السَّنَابِلَ وَهُمْ سَائِرُونَ.
24 فَقَالَ لَهُ الْفَرِّيسِيُّونَ: «انْظُرْ! لِمَاذَا يَفْعَلُونَ فِي السَّبْتِ مَا لاَ يَحِلُّ؟»
علي فكرة كان ادعاؤهم كاذب و حرفي.. الشريعة سمحت ان الواحد يفرك شوية قمح طري و ياكله لكن ما يحصدش و التلاميذ كلوا بس الفريسين اعتبروهم بيحصدوا .. هم اعتبروا ان الجمع و الفرك كانها عملية حصاد يدوي ما شافوهاش ان التلاميذ مشغولين بيسوع لدرجة مش عاوزين يضيعوا وقت انهم يعملوا اكل فبياكلوا شوية سنابل.. فيه حاجات ناس كتير بتعملها ببساطة لكن يخرج حماة الايمان و يجرموهم عقيديا و كتابيا و هيصة... مرة اغسطينوس تقريبا شاف لوحة في ايطاليا في كنيسة للعدرا و المسيح مبدعة بس كانت العدرا علي شمال المسيح مش يمينه..اتغاظ اوي و قال يعني الرسام ده يخالف الكتاب اللي قال جلست الملكة عن يمين الملك و الجمال ده كله يروح بجهل و مخالفته للطقس.. وسط ما بيفكر دخلت ست عجوزة ولعت شمعة و سجدت و اتشفعت و مشيت.. يقولك بص كده و قال بينما يتجادل اللاهوتين في علم اللاهوت يتسلل البسطاء للملكوت..



25 فَقَالَ لَهُمْ: «أَمَا قَرَأْتُمْ قَطُّ مَا فَعَلَهُ دَاوُدُ حِينَ احْتَاجَ وَجَاعَ هُوَ وَالَّذِينَ مَعَهُ؟
26 كَيْفَ دَخَلَ بَيْتَ اللهِ فِي أَيَّامِ أَبِيَأَثَارَ رَئِيسِ الْكَهَنَةِ، وَأَكَلَ خُبْزَ التَّقْدِمَةِ الَّذِي لاَ يَحِلُّ أَكْلُهُ إِلاَّ لِلْكَهَنَةِ، وَأَعْطَى الَّذِينَ كَانُوا مَعَهُ أَيْضًا».
يسوع رد عليهم بقصة يعرفوها بس لو فهموها ما كنش ادانوا التلاميذ فكرهم ان داود لما جاع هو ورجاله أكل الخبز المقدس اللي لا يحل أكله إلاَّ للكهنة. وقطعًا فرك السنابل يوم السبت هو أقل خطورة بكثير من أكل أشخاص عاديين لخبز التقدمة المقدس. وكانت الأرغفة من خبز التقدمة توضع على مائدة خبز الوجوه كل سبت لمدة أسبوع ثم يأكلها الكاهن وأسرته فقط (1صم 1:21-6).


27 ثُمَّ قَالَ لَهُمُ: «السَّبْتُ إِنَّمَا جُعِلَ لأَجْلِ الإِنْسَانِ، لاَ الإِنْسَانُ لأَجْلِ السَّبْتِ.
28 إِذًا ابْنُ الإِنْسَانِ هُوَ رَبُّ السَّبْتِ أَيْضًا».
ربنا حط القانون... كل الطقوس و كل العبادات وسيلة من اجل خلاص الانسان و مساعدته لكنها مش الهدف.. علشان كده لو ما عشناش الليتورجيا و التسابيح و الصلوات و الطقوس و فهمنا كل حاجة و حركة بتتعمل خلاصنا فيها ايه يبقي ولا ليها لازمة.. زمااان اول ما اترسم الانبا رافائيل سمعت له عظة عن التوبة في القداس الالهي.. غيرت تماما من طريقة حضوري للقداس و مشاركتي... انت في عين ربنا اهم و اغلي.. ده انا حتجاسر و اقول انت اغلي من الذبيحة نفسها.. تتصور يقولك لو بتحضر قداس و افتكرت ان اخوك زعلان سيب الذبيحة و القداس روح اتصالح مع اخوك و مع جوزك و مع مراتك و مع ولادك و مع اصحابك و مع الخدام اللي بتخدم معاهم و بعدين روح للذبيحة.. يبقي انت اغلي..
يارب نعيش روح الوصية مش حرفية الوصية..
الفارق في الشيبسي!!!! يعني ايه... واحد بياكل شيبسي في الصيام قولت له ده فطاري ده بالكباب اللي يعني لما تقرا تلاقي 6 في الالف مش عارف من ريحة ايه و لا الامر يتاخد ببساطة. .. سمنة روابي صيامي و لا فطاري... و بقينا بنعمل كل الاكل الفطاري صيامي و بقينا ماسكين في الحرف.... القصة كده حرف لكن الروح حاجة تانية... مرة ابونا ميخائيل ابراهيم القديس كان ماشي في افتقاد مع خادم عدوا علي مطعم لقي الخادم ريحة الطعمية فايحة نفسه جابته و كان صيام استاذن ابونا انه يجيب سندويتشين ياكلوهم في الطريق... ابونا قعد محطة اتوبيس من منية السيرج للخلفاوي يفهمه ان الصوم ضبط شهوات الجسد حتي لو اكل صيامي ازاي الانسان في الصوم يحرر جسده علشان ينال بركات عظيمة...
لالهنا كل المجد
نبيل شحاتة

[Mary Naeem]

ابونا قعد محطة اتوبيس من منية السيرج للخلفاوي يفهمه ان الصوم ضبط شهوات الجسد حتي لو اكل صيامي ازاي الانسان في الصوم يحرر جسده علشان ينال بركات عظيمة...
ربنا يباركك حببتي