نازفة الدم

[توتا كمال]

مش مكتوب في الكتاب المقدس إن المرأة نازفة الدم كانت بتزحف علي الارض، بس كل الرسامين اللي رسموها واضح انهم درسوا حالتها و ذاكروا كويس قبل ما يرسموا...و الصورة دي(اللي فيها وشها مش باين) اكتر واحدة بتعجبني...

➕تخيلوا معايا واحدة بقي لها ١٢ سنة في حالة نزيف دائم......
+من الناحية الجسدية:-محتاجة كام لتر نقل دم؟!...اكيد مش قادرة تصلب طولها من شدة الاعياء و الانيميا الحادة...محتاجة تغتسل كام مرة في اليوم من رائحة الدم اللي علي طول مصاحباها؟!
+من الناحية النفسية:- هي نجسة طول الوقت..و مش بس هي، لا ده اي حد هي تلمسه هيتنجس هو كمان-حتي لو اغتسل- لغاية المساء....ممنوع تقرب من حد...ممنوع تروح بيت الله تصلي عشان ماتنجسش حد..
+من الناحية المادية:-كشف الدكاترة غالي...و هي خلاص قَدْ تَأَلَّمَتْ كَثِيرًا مِنْ أَطِبَّاءَ كَثِيرِينَ، وَأَنْفَقَتْ كُلَّ مَا عِنْدَهَا وَلَمْ تَنْتَفِعْ شَيْئًا، بَلْ صَارَتْ إِلَى حَال أَرْدَأَ..

➕كان الحل الوحيد-و اللي شبه مستحيل- انها تقابل المسيح اللي معجزاته و حنيته كل الناس بتحكي عنها، من غير ما حد يشوفها عشان الكل بيقرف منها و من نجاستها...
و جاء اليوم المنشود...الدنيا زحمة...هتزحف علي الارض و هي متدارية قدر الامكان و مخبية وشها..و تيجي من وراء المسيح تلمس و لو حتي طرف ثوبه...و ساعتها نور و نقاء القدوس، هيطهروا نجاستها...و لا من شاف و لا من دري!!
"جَاءَتْ مِنْ وَرَائِهِ وَمَسَّتْ هُدْبَ ثَوْبِهِ، لأَنَّهَا قَالَتْ فِي نَفْسِهَا:«إِنْ مَسَسْتُ ثَوْبَهُ فَقَطْ شُفِيتُ»"

➕و الخطة مشيت تمام لغاية ما فجأة المسيح سأل سؤال ماكانش في حسابها خاالص....الدنيا زحمة جدااا و الناس كلها لازقة في بعض و بالرغم من كدة نلاقي الرب يسوع بيسأل:"فَقَالَ يَسُوعُ:«مَنِ الَّذِي لَمَسَنِي؟»"...
+اترعبت و اتخضت جداً...بس المسيح -كمعلم صالح - حب يخلي الفصل كله يصفق للتلميذ الخايب اللي ماحدش راضي يصاحبه و الكل بيحتقره، لكن بسبب إيمانه و عدم يأسه أخيراً نجح و جاب درجة عالية كمان...
"فَلَمَّا رَأَتِ الْمَرْأَةُ أَنَّهَا لَمْ تَخْتَفِ، جَاءَتْ مُرْتَعِدَةً وَخَرَّتْ لَهُ، وَأَخْبَرَتْهُ قُدَّامَ جَمِيعِ الشَّعْبِ لأَيِّ سَبَبٍ لَمَسَتْهُ، وَكَيْفَ بَرِئَتْ فِي الْحَالِ.فَقَالَ لَهَا:«ثِقِي يَا ابْنَةُ، إِيمَانُكِ قَدْ شَفَاكِ، اِذْهَبِي بِسَلاَمٍ»."

➕قصة المرأة نازفة الدم و تعامل ربنا يسوع معها، قصة بتدي أمل لكل حد فينا يائس و مكسور...روح عنده و كلك إيمان انك لو لمسته هتخف و النزيف اللي مغرق كيانك بجروح و افكار و معاملات و ظروف اقتصادية و ضغوط حياة مسببة استنزاف مؤلم لشخصك...بلمسة منه كل ده"هيقف"...

➕حتي لو مداري وشك عنه، هو شايف ألمك و حاسس بيك وسط كل الزحمة...تشجع يا صديقي المكسور، و المس اليوم هدب ثوبه!!😊🙏
(القصة موجودة في:-مت٩، لو٨، مر٥)