طمنوا بعض ........

[Rena Jesus]

== خالتي الله يرحمها اتقدم ليها عرسان صالونات كتير،، بس كانت بترفض ديما،، كانت بتخاف من الجواز وأنها هتأمن حياتها مع راجل غريب،، هتسيب نفسها تنام ازاي وممكن هو يبقى صاحي مش ممكن يموتها،، كانت أفكارها صعبة والناس طلعوا عليها انها تعبانة في عقلها،،
لحد ما اتقدم ليها واحد مشلول واصم،، بيتكلم بس مش بيسمع،، وقعيد على كرسي بعجل،،
جدي كان متخيل انها هترفض بس جدي اتكسف يرفض من برة برة وعمل قعدة صالونات،،
بتحكيلي انه ما اتكلمش ولا كلمة،، فضل باصص ليها وساكت،،
بعد ما مشي جدي ما راحش سألها اصلا،، لأنه متوقع الرد انها هترفض،،
لقاها داخله عليه بتقوله انا موافقة،،
جدي اتذهل،، انتي عبيطة دا مشلول ومش بيسمع بقى ترفضي كل دول وتوافقي ع دا،، قالتله اه،
وفعلا نشفت دماغها واتجوزته وعاشت معاه 20 سنة لحد ما هو مات وهي ماتت بعده بسنتين،،
سألتها مرة اشمعنى دا،، صحيح يعني هو كنتي بتعندي وخلاص،،
قالتلي لا بس يوم ما اتقدم ما اتكلمش ولا بص لشكلي ولا اي حاجة فضل باصص لوشي ومبتسم وساكت،،
شوفت في عينيه بيقولي اطمني انا معاكي اطمني ما تخافيش حسيته بيطبطب عليا بدون ولا كلمة،، طمني بنظرته،،
غير كل اللي شفتهم كانوا داخلين يعاينوا بضاعة هيشتروها،،
عينيهم كانت كلها غل وامتلاك،،
قالتلي الحياة بينا كانت صعبة بسبب ظروفه بس كل ما احس اني زهقت ابص لعينيه اشوف فيهم كلمة اطمني،،


== من يومين راكب ف ميكروباص ركب ولد وبنت صغيرين معايا،،
الولد قعد على كرسي بعيد عن البنت هما اخوات وهو باصص عليها ما شالش عينه من عليها،،
هي تقعد شوية باصة قدام وتبص ورا فجأة تلاقي اخوها باصص عليها تبتسم وتبص قدامها تاني،،
وهكذا لحد ما البنت وصلت مكان مدرستها فكانت هتنزل والواد هيكمل للمعهد الدينى ،،
البنت نزلت وهي نازلة اتكعبلت وقعت اخوها بيحاول يقوم عشان يوقفها،، هي وقفت بسرعة وبصت عليه لقيته مخضوض وواقف وبيحاول ينزل الناس عشان يقومها،،
هي ابتسمت وشاورتله أن خلاص مفيش حاجة ومشيت وهي عينها متعلقة ومبتسمة لأنها شافت في عينيه اطمني انا معاكي انا موجود،، اطمني


== كتير اوي في حياتنا بنقع والحياة بتنفخنا فعلا،، ومش بنبقي مستنين من اللي حوالينا مساعدة لا مادية ولا نفسية ولا عايزين حد يحل مشاكلنا،، بنبقي محتاجين بس حد يبصلنا ويقولنا اطمن احنا موجودين عينا عليكم بس،


==البنت اللي وقعت مكانتش مستنية اخوها يقومها بس اول ما وقفت بصت ناحيته لقت عينه عليها اطمنت وابتسمت مع ان الوقعة ممكن تكون جرحتها،، بس نسيت الجرح ويمكن ما تحسش بوجوده،، لأن فيه عين عليها بتقولها اطمني

== خالتي مكانتش مستنية معجزة تخلي جوزها يمشي ويسمع هي عارفة هي داخلة على ايه،، اتجوزته وجابت منه بنت وولد ربتهم احسن تربية تقدر عليها،، بس هي شافت في عينيه اطمني،، انا مش هساعدك بحاجة بس اطمني انا موجود


== اي علاقة بين اخ واخت اب وبنته حبيب وحبيبه زوج وزوجة،، محدش محتاج منك حاجة محدش محتاج التاني يحل ليه مشاكله،، كل اللي الواحد بيبقى محتاجه حد عينه علينا لما نقع يقولنا اطمنوا

==طمنوا نفسكوا،، طمنوا عيالكوا،، طمنوا اخواتكم،، طمنوا الناس في الشارع بنظرة وابتسامة،، طمنوا حبايبكم،، طمنوا زوجاتكم،، طمنوا تلامذتكم،،
طمنوا بعض بنظرة،، محدش محتاج من حد حاجة ..


cpd

[walaa farouk]

موضوع جميل جدا يا رينا

[Mary Naeem]

مشاركة جميلة جدا

ربنا يبارك حياتك

[MenA M.G]

دائماً مُشاركاتَكْ رائْعة
موضوعك مُمَيز
ربنا يبارك خدمتك

[Rena Jesus]

ميرسى لمروركم الغالى