لو مش بتحب .. اوعى اوعى تتجوز

[Rena Jesus]

فى سؤال بيقول ليه الناس مابتجوزش ؟
سمعت اراء ناس كتير وهما انماط مختلفة للبشر ونوعية الدماغ المنتشرة فى المجتمع ..




وجهة نظرى الناس مبتجوزش علشان ..
1. هما عايزين حاجة وأهاليهم عايزة حاجة تانية
2. اصحابهم اللى اتجوزا بيدوهم دايما فى اللاوعى كمية سلبيات رهيبة فى الجواز
ومحدش جاب سيرة الونس
3. العلاقات بقت سهلة ومفتوحة .. نتصاحب .. انما ليه ارازى نفسى
4. كمية الطلاق والمشاكل المنتشرة بتخليك تسأل نفسك طب ما يمكن اطلق يبقى اتنيل واتجوز اصلا ليه !
5. فى الغالب مفهومك عن الجواز مشوه اما بالسلب من اصحابك أو بفكرة ايجابية خيالية اكتر من اللازم
6. كلنا شخصيات ملولة .. بتسأل نفسها ليه اخسر احلامى ؟ .. واطارد اخر ويطاردنى ؟ .. والمجتمع ده الخلفة فيه قهرة .. ما انا سيد نفسى اهو 👍

كل اللى فات صح .. اوعى تضحى بأحلامك علشان ترضى أهلك والمجتمع ..
اوعى تخنق نفسك فى بيت مع حد مش طايق تبص فى وشه ..
اوعى تخلف ابدا من حد مابتحبهوش ..
اوعى تبقى واحد تانى فى المراية الصبح ماتعرفهوش .. اوعى !!!!!!!

السبب الوحيد للجواز هو الحب .. الحب وبس
وده مش خيال .. الحب الحقيقى موجود ..
شىء قوى بيربط قلبك ويومك وتفاصيلك فى ركبة شخص مستمتع هو الاخر بالربطة فى ركبتك
الحب بيهون التضحيات .. واختلاف وجهات النظر .. وصعوبة الماديات ..
والخلفة والتعب .. وسخافات الاهل .. والاحلام اللى بتخذلك ..
والجسم اللى بيمرض

الونس مع اخر بيقوى القلب .. بيقوى الروح .. بيعدى كتير .. بيلغى الانانية

لو تفاصيل الجواز عندك مهر وشبكة وشقة وقطر فات وعيال هنخلفهم ..
عمرك هيجرى من غير سعادة
لو مش بتحب .. اوعى اوعى تتجوز

[walaa farouk]

صح جدا
ميرسي كتير على مشاركتك الجميلة

[Mary Naeem]

ربنا يبارك حياتك

[Rena Jesus]

ميرسى لمروركم الغالى