لو زهقتى من الاكل ومش عارفة تنوعى

[توتا كمال]

🍲لو زهقتى من الاكل ومش عارفة تعملى ايه تعالى اقولك👇👇جبتلكم وصفات واطباق بتفتح النفس.🍲
🍔ممكن تعملى بطاطس تديها غلوه فى ملح وخل وتطلعيها تصفيها وتقليها تطلع معاكى فارم فريتس

🍔وممكن تعملى شكشوكة بيض وهى انك تقطعى بصلة قطع صغيرة خالص وتشوحيها مع حتة سمنة وتقطعى طماطميتين وتنزليهم على البصل وتحطى فلفل اسود وملح تخليهم لحد ما لطماطم تتهرى وتنزلى البيض لحد مايستوى مع التقليب

🍔او قشرى بتنجان وتبليه بالملح واقليه واعمليلة دقة عبارة عن توم وفلفل مدقوقين وملح وكمون تبلى بيهم البتنجان المقلى واعصرى عليهم فى الاخر نص لمونة

🍔ممكن تعملى مسقعة مشطشششطة تجيبى طاسة تقلى فيها بتنجان وبعدين تجيبى طاسة تانيه تحطى فيها زيت وتقلى فى الزيت قرون فلفل وقطعيها من الجنب علشان مايطرطش زيت برة وتكونى مقطعة فصين توم وتنزليهم على الفلفل وبعد كده نزلى عليها طماطم مقطعة صغير سيبيهم لحد مايقربوا يتسبكوا وحطى عليهم كمون وملح ونزلى البتنجان وسبيه لحد مالطماطم تتسبك ( وكل مالفلفل كتر كل مالطعم بقى اجمد)

🍔وفى كمان كشرى اصفر وهو عبارة عن عدس اصفر ورز بنفس الكمية او العدس اكتر شوية فى حلة حطى شوية سمنة شوحى بصلة صغيرة خالص وبعدين نزلى الرز والعدس وحطى عليهم ميا وملح وفلفل اسود سيبيه يتشرب وبعد كده وطى النار عليه واعملى جنبه سلطة خضرا او اقلى فلفل وحطى عليه فص توم وبعد كده طماطم لحد مايتسبكوا وبعدين اغرفيه وكليه مع الكشرى ده

🍔وفى فكرة حلوة قوى وانتى بتقورى الكوسة للمحشى اوعى ترمى القلب لااااا شيلى الباقى فى كيس فى الفريزر وفى مرة خرجيه وافرمى بصلة مع بقدونس وكزبرة خضرا واخلطيهم مع فلفل اسود وملح وحطيهم فى صينية وعليهم بيض مخفوق ودخليه فى الفرن

🍔او لما بتعملى الفراخ كل جمعى الكبد والقوانص وفى يوم تكونى عايزة تمشيه خرجيهم وشوحيهم مع البصل وجنبهم شويه مكرونه محمره أو بالطماطم

🍔وممكن كمان تسلقى بطاطس وتحطى عليها ملح وكمون وتهرسيهاا فى بعض وتغرفيه فى طبق وتحطى على الوش زيت زيتون

🍔البيتزا لما تيجى تعمليها وتزيد من العجينة حطيها فى كيس فى الفريزر وطلعيها وقت ماتحبى وهتفضل محتفظة بالخميرة فيها وهتنفش عادى

🍔ممكن كمان تعملى صينية بتنجان باللحمة المفرومة تقلى البتنجان وترصيه فى صينيه فرن وتعصجى لحمة مفرومة تفرديها على وش البتنجان وتحطى على وشها حلقات فلفل رومى وفوق على الوش اعصرى كام طماطمية من غير ميا وحطيها ورشى عليها ملح وفلفل وبهار

🍔القرنبيط هاتى منه كمية واسلقيه واحفظيه فى اكياس على قد الاكلة وطلعى وقت ماتحتاجى

🍔لو عندك شوربة زادت احفظيها فى الفريزر وفى مرة هاتى كيلو كوسة واحشيه وتسقيه شوربة

[Mary Naeem]

مشاركة جميلة جدا
ربنا يبارك حياتك