طقة دماغ

[walaa farouk]

ما حدش يزعل من التشبيه ده "أما الرجل ففارغ عديم الفهم، وكجحش الفرا يولد الإنسان.. (أيوب ١١: ١٢) ..

و برضه ما حدش يزعل من التشبيه ده " لا تكونوا كفرس أو بغل بلا فهم. بلجام وزمام زينته يكم لئلا يدنو اليك».. (مزمور ٣٢: ٩) ..

الفرس و الجحش و البغل(لمؤاخذة ) فيهم خصلتين عكس بعض، العند و الاندفاع ..

يجي في الهايفة و يتصدر ، و يجي في الهامة و يتعذر ..

يجري من صاحبه و يروح لعدوه برجليه ..يسمع لدماغه و طققانها و ما يسمعش للنصيحة مهما كان اخلاصها..

تقوله النار بتحرق، يحط فيها ايده لغاية ما تفّحم و بعدين يبصلك و يقولك "بجد" ؟! ..

هو البني ادم كده ، تحطه في الجنة مع ربنا يسيب كل الشجر و يختار اللي يضره ، تخلليه قاضي و بطل زى شمشون
يسيب ملكه و ينام علي ركبة دليلة الفاجرة، يحلقوله شعره و يشيله له عينيه ، تعمله ملك زي داود و تخلي اسمه في السما يغلط مع زوجة صديقه و بعدين يقتله علشان يستر علي غلطته..

الانسان ، كل انسان للاسف ماشي ورا عقله و اندفاعاته و علي بال ما يفهم يكون بعتر عمره و بهدل نفسه..

علشان كده الكتاب قال ايته الجميلة «أعلمك وأرشدك الطريق التي تسلكها. أنصحك. عيني عليك.. (مزمور ٣٢: ٨)..

الدرس ..

اوعي من دماغك و طققانها، و أسأل دايما ربنا علي رايه ، و استشيره في الصلاة و الكتاب و في اولاده المخلصين ، و اتأكد ان رأيه ليك هو الصح و الأصح مهما دماغك قالتلك..