👈👈#ازاى_اتعامل_مع__الطفل__الكداااب👉👉

[walaa farouk]

👈1👉/الكذب عند الاطفال صفة مكتسبة لازم تحددى الأسباب اللى وصلت ابنك للكذب ومنها *اساليب التربية الغلط زى (القسوة الزائدة مع الاطفال) (تقليد الأب والأم لان فى اباء بتكذب قدام الاطفال والاب والام بيفكر ان ده طفل مش هياخد باله) ( الكذب للفت الانتباه بسبب شعور الطفل بالاهمال فيتعمد يقول كلام كذب لصحابة مثلا عشان يحس انه بيجمل ذاته) (الكذب للهروب من المسئولية زى ما بيكذب انه مااخدش حاجة النهاردة فى المدرسة افهمى على طول ان فيه مشكلة دراسية بيقابلها عشان كده بينكر انه خد ) (الكذب للشعور بالقوة وده بسبب ان الام بتوصف الطفل بالضعف فيبدأ يألف قصص لصحابة ياخد فيها دور البطل القوى )

👈2👉/لو ركزنا فى كل الأسباب اللى فوق دى .. هنلاقى ان العيب مش فى الطفل العيب فى الاهل .. يعنى مثلا لما قولنا ان سبب الكذب ممكن يكون الام بتوصف ابنها بالضعف وبتقوله دايما كلام سلبى .. عشان تعالجى ده لازم تحاولى تتحكمى فى الكلام اللى دايما بتسمعية لابنك .. زى الكذب قدام الطفل .. حاولى لو مصممة تكذبى مايكونش قدام الطفل ..

👈3👉/ قصة كده سمعتها عن ام راحت لدكتور نفسى للاطفال عشان تعالج مشكل الكذب الدكتور قالها تفتكرى ايه السبب اللى بيخلى ابنك يكذب ؟ قالتله معرفش ثوانى يا دكتور ارد على الموبيل .. الو ايوة يا حبيبتى لاء انا شويا وجاية انا فى (السوق ) استنينى ..

👈4👉/كذب الطفل قبل سن الخامسة مابيكونش كذب الطفل هنا بيبقا لسه مش عارف يفرق بين الحقيقة والخيال وماينفعش خالص تعاقبى طفل اقل من خمس سنين على كذبه ..تقدر نقول على الطفل اللى بيكدب ف السن ده خياله واسع

👈5👉/من اساليب علاج الطفل الكذاب هو عدم وصفه بالكذب وابعدى دايما عن الكلام ده ( بطل كذب .. انا اصلا عارفة انك كذاب .. ماحدش يصدقه انا عارفة ابنى كذاب .. ) واستخدمى الكلام ده ( انت صادق .. انت جدع وبتحب الصراحة .. انت صاحب ماما وماما بتحبك )

👈6👉/القصص الهادفة احكى لطفلك دايما قصص عن الصدق ونهاية الكذب والكذابين .

👈7👉/الصبر عليه مش بسهولة يكون الطفل الكذب صفة اساسية فيه وتبقا عايزة فجأة يبقا طفل صادق .. وانتى بتربى ابنك صح هتلاقى نفسك محتاجة فعلا تربى نفسك على الصبر طولة البال بلاش تختارى القسوة فى التعامل عشان يبعد عن الصفة دى .. هيبقا صادق قدامك لكن قدام الناس هيكذب .. لازم تعرفى انك بتعالجى مشكلة مش مجرد حاجة يتغير فيها قدامك وبس ..

👈8/👉/ صاحبى ابنك دايما الابن بيخاف يقول الحقيقة عشان عارف ومتأكد ان مامته هتضربه .. فبيريح دماغه ويكدب لكن لو فى حوار بينكم ومناقشة عن كل تصرف بيعمله .. هتلاقى فى صراحة منه بشكل تلقائى .. وبرضة بلاش توعد الطفل بشئ و انت عارف انك صعب تحققه.

👈9👉/ اخر حاجة عدم التركيز على كذب الطفل وخصوصا لو كذب عارض ولو صفة اساسية فيه لازم تعرفيه ان بسهولة الناس بتكشف الكلام الغير صادق وبرضة إشباع خيال الطفل عن طريق الرسم وقراءة القصص والموسيقى أو مشاهدة البرامج المفيدة..

[magy]

مشاركة جميلة جدااا

ربنا يبارك حياتك ولاء

[Mary Naeem]

مشاركة جميلة جدا


ربنا يبارك حياتك

[walaa farouk]

ماجى
مارى
ميرسي كتير على مروركم الغالى

[Rena Jesus]

ميرسى ربنا يبارك تعب محبتك

[walaa farouk]

ميرسي على مرورك الغالى رينا