صاحبتي بتحكيلي ليه مش عايزة تتجوز !
أهم جزء قالته جملة عن واحد بتحبه ومارتبطتش بيه وحكت عن الاربعة اللي أتخطبت لهم والقصص بالتفصيل
فانا سألتها سؤال واحد .. هو اللى حبتيه ده راح فين ؟
قالتلى موجود على مسافة ما ..
فسألتها عمرك ما سألتى نفسك في كل التفاصيل دى أنك غلطانة و الرجالة اللي ارتبطتي بيهم ماكانوش وحشين
و انك فصصتى وركبتى وشيلتى وقصيتى على راحتك كل مرة في العلاقة ومانفعتش ..
ليه بتدورى على خيال راجل بتحبيه في كل راجل بتقابليه ؟
..فعيطت
أحيانا الانسان بيدور على بديل مريح لكائن يسكن القلب ..
فبيعقد مشاعره أكثر !
قلتلها قدامك شهر تحاولى ترجعيه بيها وتخليه هو اللى يجرى وراكى كمان
.. بس نتفق ..
هو شهر واحد فرصة انعاش للعلاقة دى ؟؟ ..
لو نفعت هتبقى سعيدة و لو مانفعتش هتبقى سعيدة مع نفسك ..
هتقعدى سنة كاملة من غير راجل ..
لا خطوبة و لا مشاعر و لا حتى صداقة ..
هتركزى على كل اللى جواكى وشغلك وشكلك ودماغك ..
تسافرى .. تلعبى رياضة ..تشتغلى ..
المهم أنك تحبى نفسك وبس ..
لحد ما قلبك يدق بجد مرة تانية من جديد ..
لازم بعد اى تجربه حب فاشله ندى لنفسنا فرصه .... هدنه
علشان ما نظلمش اللى هنرتبط بيه بعدين وكمان منظلمش نفسنا
