الحياة الزوجية (احتواء)

[walaa farouk]

نسبه كبيره من نسب الطلاق ، او الناس اللي عايزه تطلق بنلاقي ان الطرفين اشخاص محترمه جدا ، يعني راجل مهذب وناجح ومحترم ، وانسانه برضه مهذبه وناجحه ومحترمه بس مش قادرين يكملوا مع بعض ..

السبب في الطلاق ، مش خيانه ولا بخل ولا لسان طويل ولا كل الاسباب اللي كنا بنسمع انها اساس الطلاق ..

السبب المنتشر حاليا بيكون انهم مش عارفين يحتووا بعض .. كل طرف مش عارف يملي المساحه الفاضيه اللي جوا التاني .. كل طرف مش قادر يلبي الاحتياج النفسي والعاطفي للتاني .. كل طرف مش عارف يحب التاني الحب اللي هو محتاجه واللي هيخلي عنده اشباع عاطفي ..

لو عايز بيتك يبقي ناجح لازم تكون مكفي مراتك ، وتكوني انتي مكفيه جوزك ..

تكفي مراتك مش اكل وشرب ولبس وفسح وسفر .. كل ده حلو بس مش اهم حاجه ، الاهم انك تكون مكفي احتياجها من الحب والحنان ، احتياجها للطبطبه والحضن الحنين الصادق وقت تعبها ، احتياجها لاحساس الامان والدفىء .. احتياجها من الفضفضه والكلام .. احتياجها لشويه لحظات حب وعشق .. وشويه لحظات جنون ..

اتكلموا مع بعض عن احلامكم وطموحاتكم وعايزين بكره يبقي ازاي ، اسمعها واسمع مشاكلها حتي لو بالنسبه ليك مشاكل تافهه ، اسمعيه بقلبك قبل ودانك وشوفي بيفكر في ايه وشاركيه افكاره وطموحاته ..

بيحب متشات الكره ، اتفرجي معاه علي الدوري .. بيحب يلعب بلاي استيشن اتعلمي تلعبيها عشان خاطره ..

هي بتحب الافلام النكديه والمسلسلات التركي ، خصص من وقتك ولو مره في الاسبوع واتفرج معاها فيه علي الحاجه اللي بتحبها ..

الحياه الزوجيه مش انكم عايشين في بيت واحد بتاكلوا وتشربوا وتناموا وتشتغلوا كتير وتجيبوا فلوس وتربوا العيال ، الحياه الزوجيه " احتواء" ..

احتووا بعض ، واحتووا مشاعر بعض ، واظهروا حبكم لبعض ، وقولوا لبعض الكلام الحلو اللي مهما بنكبر بنحتاج نسمعه ونحسه .

[Mary Naeem]

مشاركة جميلة جدا

ربنا يبارك حياتك

[Rena Jesus]

مشاركه جميله جدا
ميرسى ربنا يفرح قلبك
ويبارك تعب محبتك

[walaa farouk]

مارى
رينا
ميرسي كتير على مروركم الغالى

[MenA M.G]

موضوع أكثر من روعة .. مشاركة جميلة جدا
دائماً فى تقدم ورقى
ربنا يبارك خدمتك