ما تيجوا نحكي الحكاية من الاول 🤓
كان فيه واحد ربنا قاله تعالي ابعتك لناس وحشين علشان تقولهم توبوا و ارجعوا .. بس المشكلة ان الناس دول كانوا من الامم و يونان وكل شعب بني اسرائيل مكنوش بيحبوا الامم .. كان تصرفه انه مردش علي ربنا ولا قاله اي حاجة و راح هِرِب من ربنا جوا سفينة رايحة لترشيش .
* عملت كدا ليه يا يونان ؟
يونان : دول امم و انا مش بحبهم
* بس ربنا عايزك تخليهم يتوبوا ؟
يونان : اكلمهم فيتوبوا و ربنا يسامحهم و اطلع انا اللي شكلي وحش ف الاخر .. مش كدة ؟
* يعني انت مش مهم عندك ان الناس دي كلها تهلك ؟
يونان : طب ما يهلكوا.. ما هما امم و مش من شعب ربنا اصلا و انا مش بحبهم
* بس ربنا عايز يخلصهم و عايزك تبقي سبب في خلاصهم ؟
يونان : اشمعني انا يعني ؟ انا مش عايز اروحلهم .. انا ريحت دماغي و هربت من ربنا و من نينوي كمان
* ليه يا يونان مكانش عندك رحمة علي الناس اللي مش بتحبهم دول ؟؟؟
الكتاب المقدس بيوصف لنا بمنتهي الدقة مشاعر يونان كانت ايه بعد ما راح كلم اهل نينوي و هما سمعوا لكلامه و تابوا و لبسوا المسوح من اول الملك لحد البهايم :
فَغَمَّ ذلِكَ يُونَانَ غَمًّا شَدِيدًا، فَاغْتَاظَ.
2 وَصَلَّى إِلَى الرَّبِّ وَقَالَ: «آهِ يَا رَبُّ، أَلَيْسَ هذَا كَلاَمِي إِذْ كُنْتُ بَعْدُ فِي أَرْضِي؟ لِذلِكَ بَادَرْتُ إِلَى الْهَرَبِ إِلَى تَرْشِيشَ، لأَنِّي عَلِمْتُ أَنَّكَ إِلهٌ رَؤُوفٌ وَرَحِيمٌ بَطِيءُ الْغَضَبِ وَكَثِيرُ الرَّحْمَةِ وَنَادِمٌ عَلَى الشَّرِّ.
3 فَالآنَ يَا رَبُّ، خُذْ نَفْسِي مِنِّي، لأَنَّ مَوْتِي خَيْرٌ مِنْ حَيَاتِي». ( يونان٤ )
قد كدة يا يونان مكونتش بتحبهم و هلاكهم مكانش فارق معاك ؟!!!
لكن موقف ربنا كان عظيم .. لما قال ليونان في اخر السفر :
10 فَقَالَ الرَّبُّ: «أَنْتَ شَفِقْتَ عَلَى الْيَقْطِينَةِ الَّتِي لَمْ تَتْعَبْ فِيهَا وَلاَ رَبَّيْتَهَا، الَّتِي بِنْتَ لَيْلَةٍ كَانَتْ وَبِنْتَ لَيْلَةٍ هَلَكَتْ.
11 أَفَلاَ أَشْفَقُ أَنَا عَلَى نِينَوَى الْمَدِينَةِ الْعَظِيمَةِ الَّتِي يُوجَدُ فِيهَا أَكْثَرُ مِنِ اثْنَتَيْ عَشَرَةَ رِبْوَةً مِنَ النَّاسِ الَّذِينَ لاَ يَعْرِفُونَ يَمِينَهُمْ مِنْ شِمَالِهِمْ، وَبَهَائِمُ كَثِيرَةٌ؟». ( يونان ٤ )
و انت بقي لو مكان يونان و ربنا حَب يبعتك لناس انت مش بتحبهم علشان تخدمهم .. هتقبل و الا هترفض ؟ هتروح و الا هتهرب ؟
السنة دي عيد الحب جاي في اول يوم من صيام يونان علشان يقولنا : الحب لازم يكون حب عملي مش مجرد كلام جميل و ورد و هدايا .. الحب خدمة و مسئولية مش شوية مشاعر و كلام .. ربنا ادي درس ليونان علشان يقبل الكل و يحب الكل و يخدم الكل بدون تمييز و بدون ما يقول انا شكلي هيبقي عامل ازاي .. ربنا خلي يونان يدوق عمق جديد في الخدمة اللي اساسها الحب ❤️
منقول بقلم ماريان عادل
