أبونا بيشوي كامل يرد على إتهام الكنيسة القبطية بالتعصب

[walaa farouk]

التفاهم في الشر ممنوع ممنوع ممنوع! ثانيًا هو تضييع للوقت.. المفاوضات دية بيننا وبين الشيطان ممنوعة... واحد يقعد يناقشك في موضوع كده لا يمت بصلة لحياتك.. بيضيع وقتك.. وبعد ما يضيع وقتك لازم يكون أثر فيك! ولو واحد في الألف، وده رأي الناس بتوع علم النفس.

واحد بتاع شهود يهوه عمال يناقش.. تخش أنت معاه في المناقشة.. العيار اللي ميصبش إيه يدوش... وتقول الله ده أنا مخي أتلخبط.. وده اعتراف واحد من الشبان ولا من الشابات مرة قالي كده أنا مخي أتلخبط.. قل له أنا مش قلت لك ما تروحش تتفاهم مع الأخ ده. الكتاب قال لا تقول له سلام.

وده حصل للبابا .. في مرة من المرات خلاص هو واثق إن آريوس... فجه ناس قالوا له لا برضو أنت متعسف شوية مع آريوس. ما تتفاهم معاه وإحنا برضو في النص.. أنت تعرف البطرك اللي جه بعد البابا بطرس خاتم الشهداء سامح آريوس.. سامحه أرشيلاوس وبعدين جه البابا الكسندروس حرمه بقى تاني... ما أعتقدش أن البابا أرشيلاوس آمن بآريوس أبدًا. لكن آريوس دائمًا نبيه. فدخول الأصدقاء في العملية دي تموية.

دي بنسميها يا أولاد تشتيت الجبهة الداخلية بتاعة الكنيسة، الكنيسة رأي واحد وفكر واحد! وبعدين يطلع واحد أخ كده يقولك يا أخي ليه التعصب ده بتاع الكنيسة مثلًا وبتدقق على الموضوع ده.. ليه واقفة ضد البدعة الفلانية دي وقفة جامدة كده؟ مش شوية كده وشوية كده.. شوية كده وشوية كده إيـــه؟! هو التعامل مع ربنا شوية كده وشويه كده !! آخو ده مايصحش يتقال!!

شوية كده وشويه كده لو تشتري حمص ولب وبتاع، شوية كده وشويه كده في العقيدة بتاعة الكنيسة! إزاي يبقى شوية كده وشوية كده؟! يعني واحد ما بيآمنش بالإعتراف وواحد بيآمن بالإعتراف! واحد ما بيآمنش إن ده جسد المسيح ودمه وواحد بيآمن أن ده جسد المسيح ودمه!

إيه بقى اللي نص نص؟ تطلع إيه دي بقى؟ يطلع إيه علشان تتفاهموا.. ده تعصب من الكنيسة. واحد مبيآمنش بالمعمودية بروتستانت، جه دخل الكنيسة قلت له يا ابني متتناولش لازم تتنصر! قالي طيب ما أنا أتنصرت. قولت له القسيس اللي عمدك ما بيآمنش بالمعمودية.. الولاد التانية بتاعتكم لما تكبر، أووه ده أنتم متعصبين بقى زيادة عن اللزوم. وشد بقى.. لا يا حبيبي مانشدش.

يعمل إيه المسيح قال كده.. إن من لم يولد من الماء والروح لا يدخل ملكوت السماوات. فيجيب واحد واسطة فيلاقي واحد تعبان جوه الكنيسة من ولاد الكنيسة اللي بيعتبوا على الكنيسة إن الكنيسة ساعات إيه بتزودها شوية كده!



عظة لأبونا بيشوي كامل
عن "سفر نحميا"