مش كل اللى بيبين حاجة ..
غير اللى جواه .. يبقى وحش ..
فيه ناس بتضحك ..
عشان تتحدى الحزن اللى جواها ..
والغريب ان الناس اللى قدامهم بيصدقوهم ..
والجميل ان بضحكتهم بيفرحوا ناس حزينة ..
والرائع انهم بيخلوا الحزين يروح يفرح حزين غيره ..
الناس اللى بيبينوا غير اللى جواهم ..
مش كدابين ..
دول ابطال .. مش كتير يعرفوا يبقوا زيهم أبطال ..
مش كل واحد ..
اللى فى قلبه على لسانه ..
تبقى حاجة حلوة ..
مايمكن فى قلبه حقد وغل ..
مايمكن فى قلبه حسد ونميمة ..
لو اللى فى قلبك وحش ..
داريه ..
اللى حواليك مش ناقصين ..
وواصل لهم احساسك ..
مش لازم تأكده بكلامك ..
مش كل واحد "طيب" ..
مصرّح له يعمل اى حاجة ..
هو طيب .. بس عصبى ..
هو طيب .. بس ما بيمسكش لسانه ..
هو طيب .. بس وقت النرفزة مابيتحكمش فى نفسه ..
طب طالما عصبى وبيغلط ومابيتحكمش فى نفسه ..
ينفع نفول ..
هو "مش مؤدب" .. بس طيب ..
هو "مش متربى" .. بس طيب ..
لا طبعا ماينفعش ..
الطيب ..
مابيعرفش يغلط ولا يجرح .. اصله طيب ..
الطيب ..
مابيقدرش يعاير ولا يعنف .. اصله طيب ..
ولو فيه كل الصفات دى ..
يبقى الطيبة مش صفة غالبة ..
بلاش نسمح للشيطان ..
يدينا تصاريح نعمل الغلط ..
بإسم الصح ..
اتق شر الحليم اذا غضب ..
ماهو ساعة ما هيسمح للشر انه يملاه ..
يبقى بيتنازل بمزاجه عن لقب .. حليم ..
مش كل اللى بيعيط .. مهزوم وضعيف ..
يمكن دى دموع خسارة ..
انه ماعرفش يدمر اللى قدامه ..
يمكن دى دموع فشله ..
انه ينتقم من اللى قدامه ..
او يمكن دموع اليأس ..
من انه ياخد حق مش حقه ..
اختبروا الدموع ..
خليكوا ناصحين ..
عشان ماتدوسوش ع المظلوم ..
بحجة ان الظالم بيعيط ..
وخدوا على كدة كتير ..
مش كل اللى لابس حلو .. غنى ..
ومش كل اللى لابس وحش .. فقير ..
ممكن يكون الاولانى نزيه فى لبسه ..
والتانى بخيل حتى على نفسه ..
مش كل اللى بيتصور بيضحك .. مزقطط ..
يمكن يكونوا الكام ثانية بتوع التصوير ..
هم فرصته الوحيدة للضحك ..
وخد عندك أهم "مش كل" ..
مش كل ..
وضع سئ انت محطوط فيه ..
يبقى ربنا مسئول عنه ..
ماتولعش سجارة ..
وانت واقف فى البنزينة ..
ولما تحصل الكارثة ..
تبص لفوق وتقول له ..
مش كفاية كدة ..
والمفاجأة ..
ان مشاكل كتير فى حياتنا ..
مش بتتحل ..
لأننا مش عايزينها تتحل ..
غير بالطريقة اللى نختارها ..
م الاخر ..
المخلوق عايز يمشى كلمته ع الخالق ..
وفى الاخر يعيش مرتاح ..
والكلام ده حقيقى جدااا ...
أمير تادرس
