كان فيه كاهن كل لما يروح عمارة يعمل تبريك منازل يصر انه يصلي في كل شقة صلاة خاصة
الناس تقوله يابونا صلي في شقة العيلة واطلع رش الشقق
ميرضاش ابداً
يخلي كل اسرة تدخل شقتها ويدخل معاهم ويصليلهم صلاة خاصة
وكان كل واحد من افراد الاسرة بيديله ظرف فيه مبلغ بسيط نظير خدمته ، وكان بيرفض لكن مع اصرارهم كان بياخده
الموضوع اتكرر كتير بشكل استفز افراد الاسرة
وكانوا بيقولوا مابينهم وبين بعضيهم ان ابونا انسان انتهازي وبيعمل كده مخصوص علشان بدل ماياخد ظرف واحد ياخد خمس اظرف
والكلام انتشر في كل حته وسمعة ابونا بقت سيئة
وفي مرة نسي ابونا عندهم نضارة القراية بتاعته ونزل
فجري وراه واحد من افراد البيت علشان يديهاله
فإتفاجئ ان ابونا بيدي كل الاظرف للبواب بتاع العمارة من غير حتى مايحاول يفتحهم ولا يشوف جواهم ايه
مش بس كده ، وسمع كمان البواب وهو بيقوله " كده كتير يابونا ، ده انت كل سنة بتعمل معايا كده "
وهنا تنطبق الاية الجميلة اللي بتقول " الرب يدافع عنكم وانتم صامتون "
كم مرة وقعت في مأزق ولقيت نفسك بتطلع منه
كم مرة حد احرجك بالكلام ولقيت اللي بيدافع عنك وياخدلك حقك
كم مرة ناس غلطت في حقك ولقيتهم ندموا بعد كده واعتزرولك
كم مرة حسيت بإيد ربنا في حياتك !!
فعلا ، اللي يحط نفسه جوه ايد ربنا يفضل طول العمر مرفوع
مايكل سامي
