داود ويوناثان داقوا حلاوة الحب

[walaa farouk]

" يا ابن المتعوجه المتمرده اما علمت انك قد اخترت ابن يسى لخزيك وخزى عورة امك 😳 "
الكلمات دى من اصعب كلمات العهد القديم لو مكانتش الاصعب .. لا والاصعب ان إللى قالها اب لابنه 😳 ..
قالها شاول ليوناثان ..
لا ودا مش بينهم وبين بعض دا قدام كل قادة الجيش 😳 ..
طب ليه قاله كده ؟؟ .. بسبب داود ..

الغريب بقا ان يوناثان مشغلش باله خالص بالاهانه قدام الناس ولا وقف يقول لابوه ازاى تشتمنى بامى كده .. فضل كل إللى شاغله حبيبه داود ..
وقال لابوه " لماذا يُقتل .. ماذا عمل ؟ "
شاول من غيظه وجه الرمح ناحية يوناثان ابنه ليطعنه ..
هيموّت ابنه 😳 ..
تخيلوا ابوه حاول يقتله ..
الاعجب ان يوناثان قام من المائده ويقولك " يوناثان اغتم من زعله على داود "
اغتم عشان زعلان على حبيبه داود مش عشان ابوه شتمه اصعب شتيمه قدام الناس ولا عشان ابوه حاول يقتله ..
عشان كده داود عيط اوى يوم ما حس انه خلاص هيفارق يوناثان .
. هبقى احكيلكم الحكايه دى 😊 ..

فيه ناس ممكن نستحمل عشانهم اوى زى ما عمل يوناثان كده
بس بيصعب علينا انهم مش زى داود .. مش حاسين بمحبتنا ليهم ..
بيوجعنا اوى منهم اننا قدمنا حب ..
كل حب وهم حسبوا كل حاجه بالعقل ..
وياريتهم حسبوها صح ..

على اد المعزه هتلاقى إللى يستحمل عشانك ..
فيه حد هيستحمل كتير اوى اعرف انه بيحبك خالص ..
دا يوناثانك .. يوناثان إللى ربنا بعتهولك
.. دا تمسك فيه بايدك وسنانك ..
تقول زى عروسة النشيد امسكته ولم ارخه .
. اوعى تسيبه اوعى ..

داود_ويوناثان_داقوا_حلاوة_الحب ..