ايه الحكمه في كده

[Rena Jesus]

كان في دير علي البحر الدير دا مكانش في حد بيزوره .
ففكر راهب من رهبان الدير انهم يعملوا صليب كبييييييييير وعليه تمثال السيد المسيح
عشان كل البحاره اللي بيعدوا من المنطقه دي يعرفوا
ان هنا في دير وفعلا عملوا الصليب والتمثال عليه
وكان في غايه الروعه والجمال وبقي كل البحاره اللي يعدوا من المنطقه دي يشوفوا القبه اللي عليها الصليب
ويروحوا يسجدوا ويصلوا تحت الصليب دا.
وكان في راهب في الدير دا عجبوا خالص الصليب وشكل التمثال
فقرر انه يصلي تحته فبقي كل يوم يجي ويصلي تحت الصليب
ويطلب في كل يوم طلبه واحده ان هو يكون بدل السيد المسيح ولو يوم واحد علي الصليب
عشان يشوف قد ايه ربنا اتعذب علي عود الصليب
فبقي يكرر الطلبه دي في صلاه كتير .
وفي يوم من الايام هو وبيصلي راح رد عليه التمثال بتاع السيد المسيح
وقاله انا سمعت لطلبتك وانا موافق ان انت تطلع مكاني علي الصليب لمده يوم واحد
بس بشرط انك مهما تسمع او تشوف ملكش دعوه ومتتكلمش .
الراهب دا وافق علي الشرط وفي تاني يوم الصبح هو والراهب بيفتح عنيه من النوم لقي نفسه متعلق علي عود الصليب مكان رب المجد .
بعدها بشويه راح دخل الدير راجل بحاره غني خالص هو وبيسجد قدام الصليب محفظته وقعت ومحسش بيها وصلي ومشي
الراهب شاف كده بس مقدرش يتكلم عشان افتكر وعده مع ربنا.
بعدها بشويه راح دخل واحد فقير يصلي تحت الصليب ويقول يارب انا محتاج فلوس عشان اولادي وانا عليا دين عايز اسده فوجد المحفظه بتاعه الراجل الغني
فافتكر ان ربنا سمع صلاته فشكر ربنا واخدها الراهب كان عايز ينزل يقوله لا دي مش بتعتك افتكر وعده مع ربنا فمقدرش ينزل.
بعدها بشويه دخل راجل يصلي تحت الصليب ويقول من فضلك يارب هدي الموج و الريح النهارده عشان مركبتي توصل في معادها البلد
عشان الحق بيتي من الخراب وولادي ومراتي من التشرد
وهو وبيصلي لقي البوليس والراجل الغني داخلين عليه
وبيقلوله المحفظه وقعت هنا يبقي انت اللي اخدتها انت لازم تتسجن يا اما تسدد الفلوس
ففي اللحظه دي الراهب مقدرش يستحمل فنزل من الصليب وحكي كل اللي شافه للبولس عشان يسيبوا الراجل دا.
راح البوليس ساب الراجل يسافر وقبض علي الراجل الفقير اللي اخد المحفظه
وبعد كده رجع الراهب يصلي تاني تحت الصليب لقي ان ربنا مش راضي يكلمه فقعد صلي بدموع ربنا اتحنن عليه وكلمه .
الراهب سال ربنا انت ليه زعلان مني انا عملت ايه انا عملت الصح؟
رد عليه رب المجد وقاله :انت خلفت وعدك معايا واتكلمت
الراجل الغني اللي وقعت منه فلوسه دا كان رايح يمشي بيها مع واحده غير مراته وانت خليته فعلا يعمل كده لما رجعتهالوا .
والراجل الفقير اللي انت اخدت منه الفلوس انا كنت باعتهالوا عشان هو في ضيقه ماليه ومحتاجها .
والراجل اللي انت انقذته من السجن انا كنت هاادخله السجن لغايه ما المركب تفوته عشان المركب دي كانت هاتغرق وبعد كده كنت هاطلعه وانت خليته يلحق المركب
لكن انا هاعرف ازاي انجيه من الموت وانقذ بيته واولاده .
ياريت منقولش ليه ربنا بيعمل معانا كده او ان ربنا ناسينا عشان بيتاخر علينا في استجابته .
ربنا لو اتاخر علينا في طلب اكيد ليه الحكمه في كده واكيد هو مخبي لنا حاجه احلي بكتير !!