وَلاَ تُشَاكِلُوا هذَا الدَّهْرَ، بَلْ تَغَيَّرُوا عَنْ شَكْلِكُمْ بِتَجْدِيدِ أَذْهَانِكُمْ، لِتَخْتَبِرُوا مَا هِيَ إِرَادَةُ اللهِ: الصَّالِحَةُ الْمَرْضِيَّةُ الْكَامِلَةُ. " رو ١٢ :٢
الآية دي ديما تشغل بالي ...يعني ايه اجدد ذهني ..لغاية ما لقيت فكرة بسيطة
سارة بنتي قررت من شهرين تلعب كرة قدم بالنادي و انا شجعتها رغم انها مش موهوبة لكن طالما عاوزة و فيه إمكانية قلت تلعب رياضة و تتعلم ...مشيت كان بها اديها اتعلمت و كسبنا ميسي جديد حريمي ...ما مشيتش هي لوحدها حتزهق و مش حتكمل ...انا بحب اشجعهم علي اي هواية يفكروا فيها لحد ما يكتشفوا مواهبهم و إمكانياتهم...المهم بوصلها التمرين و كبرت في نافوخي بدل ما بقعد ساعتين فاضي بتفرج عليها اني اخسس وزني و العب حاجة بحبها بس مش بعرف العبها أو اروح لها عند العودة فقط ...قلت اتعلم تنس ...كنت زمان جربته ٤ مرات كده و ما كملتش ...اتعرفت علي مدرب سنه ٦٢ لكنه اكثر شبابا من الذين في الثلاثينات ....تخصص تعليم الكبار سنا أمثالي و كان زمان في الاردن ١٩ سنة بيعلم ولاد العاهل الأردني و بيدرب في نادي هناك ... ابتديت اتعلم ..!! و مشكلته معايا اني بلعب قبل كده تنس طاولة .. و قواعد التنس مختلفة جملة و تفصيلا عن تنس الطاولة و كانت كل حركاتي و لعبي بالمضرب بخبرات تنس الطاولة و طبعا الكورة ما كانتش بتوصل و كانت فقرة التدريب عامل فيها زي فيلم عودة الندلة و لعب عبلة كامل ...كان كل شوية يوقف التدريب و يناديني و يشرح لي انا بعمل ايه و المفروض اعمل ايه و ازاي اغير فكري و ذهني عن اللي عارفه عن تنس الطاولة ...مرة يا عيني زهق و قالي يا ا. نبيل انا بتكلم في وادي و انت في وادي تاني...كنت بقوله أنا فاهمك بس مش عارف اتوافق بين اللي فهمته ذهنيا و حركة جسمي اللي ليها خبرات تنس الطاولة ....بقيت و انا بتعلم اقول لنفسي بصوت عالي لنفسي عند كل لعبة ...افرد ايدك ..رجلك اليمين ...هات المضرب ورا ...و اكرر تعليمات المدرب بصوت عالي و انا بلعب كل لعبة و اغير تفكيري من تنس الطاولة لتنس بس .. و كل مرة بقيت اركز اني ادرب ذهني علي التعليم الجديد ...فيه لعب من كتر ما كنت بفشل خصوصا الباك كان بيصعب عليا الولد اللي بيلم الكور خصوصا اتصورت للحظة اني مش ممكن اعرف ارد الكورة و كل مرة يكرر عليا اني اغير ذهني و اركز ..وانا احاول .. دلوقتي اتعلمت مبادىء اللعبة و بقت الكرة رايحة بيني و بينه و ابتدي يعلمني مهارات اللعبة و كتير يصفق لي علي رد كور كنت مش متخيل اني حعرف اردها ..
الرغي ده كله علشان اشرح ازاي فهمت تغيير اذهانكم دي ...
كتير بنفضل نلف في حلقة مفرغة لاننا مش راضين نغير ذهننا ... كتير بنتعامل مع ربنا بنفس الأفكار القديمة عنه ...أنه معرفته مكلفة ووصيته تقيلة أو أن وجوده يعني ما نتالمش و لا نتجربش أو وجوده مجرد وجودنا في خدمة و طلب شفاعة قديسين أو سداد نذور أو طلب معجزات و تخيل علي طول الطريق أنه بيدير حياتنا بالمعجزات ..كتير بنتعامل مع نفسنا بمخاصمة و ما نحبهاش و مش راضين نبص الا علي تشوهاتها او مناطق حرمانها و مش راضين نغير ذهننا فندور علي مناطق الجمال اللي فيها أو الجزء اللي عندنا و مش محرومين منه ... كتير بندير خلافاتنا الأسرية مثلا بغباء و نقع في فشل متكرر و صدام لأننا بنفكر بنفس الذهن العتيق ...فكر مسبق و خبرات مسبقة سواء جزء منها حقيقي او خيال فكرة أو عقيدة ذهنية بلا منطق و لكن متمسكين بيها ...زي منطق أن الرجل لا يامن له نسائيا او أن الزوج دائما بيخبي اسرار أو تتعامل الزوجة بمنطق أنه ما بقاش يحبها زي زمان فتفضل عينيها مقفولة بالذهن العتيق مش راضية تستقبل اي تعبيرات حب خارج نطاق ما اعتادت عليه أو زوج يتصور غباء الزوجة و عدم قدرتها علي فهمه و يبني الحوار علي هذا العتيق و لا يجدد لا في طرحه للموضوع فربما طريقته هي السبب و في كل مرة نفس الكلمات و الخناق و الزعيق ...يتقلب الحوار لعراك و اتهامات مرسلة و يدخل في نطاق الغضب الذي بلا عقل لان كل طرف مش راضي يغير ذهنه و يبص بطريقة تانية او يفهم الموضوع مش بفكر المؤامرة ( تنس الطاولة ) لكن برؤية جديدة و قواعد جديدة ( التنس ) و ده اكيد بيحصل في تربية ولادنا ..كتير بنمارس خدمتنا بنفس الطريقة اللي اتعودنا عليها و بذهن عتيق و ادوات و اداء خبراتنا القديمة ( تنس الطاولة ) و ما بنجددش ذهننا و نغير أساليب ادائنا لتتناسب مع تغير الأجيال و طبيعة الشباب حاليا ( التنس) ..
ده اللي يعمله تجديد الذهن ..في الاول ارتباك بينه و بين الفعل الحقيقي لكن الاصرار علي تجديد الذهن بياخد استنارة الروح القدس و ندخل في اختبار يخلينا نصدق و ندوق حاجة جديدة حتي لو فيه تغصب....زي ما عملت كده ..غيرت ذهني و اتغصبت الاول لإخضاع جسمي للأداء الحركي المناسب للذهن الجديد و كل مرة الكورة بتوصل بتشجع اكتر و اصدق اكتر و بعدين دخل الموضوع في تلقائية اللعب ما بقتش اقول كل مرة لنفسي افرد ايدك و لا رجلك اليمين ...بالعكس ابتديت استمتع و العب بمهارة اكتر ..حتروح الكنيسة غصب شوية حتصلي و انت مالكش مزاج تصلي و حتمسك أجبية و انا مش متعود و حتغير ذهنك اللي بيقولك صلي بالطريقة اللي تعجبك و لما يجيلك مزاج ...و بعد شوية حتلاقي أعماق في اللي بتعمله و حتبقي بتعمله من غير ما تفكر ..حتلاقي جسمك بيصحي بدري تروح القداس و حتلاقي ايدك بتترفع تقول مزمور ..ممكن كده نوصل لاختبار إرادة الله و بعد شوية نلاقي نفسنا ما بنقولش عاوزين نعرف إرادة الله في الموضوع ده لأنه خلاص بقة بقت مختبرة و اللعب بقي تلقائي ووضع المضرب بقي عفوي و ندخل في منطقة التلذذ بربنا و الاستمتاع بيه .. مرضية دي تنفع الاتنين ترضي المدرب و ترضيني ...ترضي ربنا و انا ارضي و اشكر حتي لو في تعب و الم بس لما جددت ذهني و أخضعت نفسي اروح و فعل التجديد ده دخلت في منطقة الاختبار و العشرة ...غيروا ذهنكم ..غيروا ذهنكم في مفاهيمكم عن ربنا ...غيري ذهنك عن نفسك و عن طريقة ادارتك الحياة و عن جوزك شوفيه بعين جديدة و أنه مش مجرد كائن ذكوري مزعج أو تنازل عن محبتك ...غيري ذهنك في خدمتك لولادك و أنهم مش مجرد مسئولية و هم و انك الفيليبينية اللي جابها ابوهم ....اطبخي و نضفي و ساعدي في المذاكرة كل ده بحب ..حتلاقي لغتك اختلفت و هم كمان بيتغيروا .. و بدل حتتطفحوا ايه و لا ارحموا اهلي شوية و لموا هدومكم و لا تنقلبي نونة المجنونة و رابطة شعرك سلعوة و انت بتذاكريلهم و عصبية و اتهامات و عدم تصديقهم و تكذيبهم علي طول الخط حتلاقي دنيتك بقت اسهل و خرجتي بره الضغط اللي انت سجنتي نفسك فيه لما اقتنيني فكرة انك ضيعتي عمرك و زهرة شبابك اللي انقطفت بدري و بصي علي نعمة امومتك اللي اتحرم منها ناس ...بصي علي حالك لو جوزك اللي مش طايقاه ساب الدنيا و رحل .... انت غير مفاهيمك عن ربنا و أنه مجرد قيود ...بص علي مراتك بطريقة مختلفة غير متصيد النقائص ... بص علي ولادك بذهن جديد أنهم بيتغيروا و ليهم منطق لازم نسمعه علي الاقل و نقبل الاختلاف
...غير ذهنك في إدارة شغلك و غير طريقة طرحك الحلول في المشاكل ...
بكده الكورة تعدي الشبكة و تفضل رايحة جاية و يمكن تصيب نقطة و تحقق انتصار كنت ما تتصورش انك تحققه لأنك مسجون في فكرك القديم و فشل انت رسمت قضبانه....
نبيل شحاتة
25 - 10 - 2017, 10:13 AM
رد: وَلاَ تُشَاكِلُوا هذَا الدَّهْرَ، بَلْ تَغَيَّرُوا عَنْ شَكْلِكُمْ بِتَجْدِيدِ أَذْهَانِكُمْ
العرض العادي
