لكل بنت لسه فى بيت ابوها ..

[روشا الفرفوشه]

لكل بنت لسه فى بيت ابوها ..
ارجوووكى استمتعى على أد ما تقدرى ..
اولا .. نامى كتييير و بعدين قومى ارتاحى شوية وبعدين كملى نوووم .. قفلى 12 ساعة نوم ولو حد صحاكى فى النص هاتيهم تانى من الأول .. بكرا لما تتجوزى وتخلفى مش هتعرفى حتى ترمشى مش تنامى .. هتبقى زومبى عايش فى البيت
احنا انضحك علينا بأغنية الست دى أمى وهى أصلها الست دى زومبى سهرانة طول عمرها .. احنا اتخدعنا الحقى انتى نفسك
ثانيا .. اى حاجة توجعك روحى جرى لدكتور اطمنى على نفسك متهمليش فى حق نفسك استمتعى بالنعمة اللى انتى فيها .. ايوة نعمة انك اصلا قادرة تحددى ايه هى الحتة اللى بتوجعك .. بعد الجواز والخلفة انتى مش هتقدرى تحددى الوجع جاى منين بالظبط هى اصلا كل حتة فى جسمك هتبقا بتنقح عليكى عاملين مع بعض سيمفونية
ثالثا .. اتكلمى مع صحباتك كتير متبطليش رغى .. وزورو بعض وكمان زورو بعض وارجعوا من عند بعض اتكلموا تانى .. لانك بعد الجواز والخلفة شكل صاحبتك هتنسيه ويوم اما تفكرى تكلميها فى التليفون هتبقا نص المكالمة خودى كوكى عاوز يكلمك .. وكوكى هيقعد يتنفس فى ودن صاحبتك .. لا هيتكلم هو ولا هيدكى فرصة تكلميها
رابعا .. كلى كل حاجة فى البيت لو طولتى تاكلى ابوكى وامك كوليهم بكرا لما تتجوزى وتخلفى هيبقا الأكل قدامك وانتى قاعدة عينك هتطلع عليه بس مستنية دورك .. ايوة دورك بعد ما جوزك ياكل براحته خالص ويغسل ايده وياخد منك الواد اللى لازق فيكى ومش راضى يسيبك تاكلى و بعد ما ياخده منك هتاكلى متسربعة على انغام وقوقة المحروس اللى مستنيكى تخلصى بسرعة علشان يشفط الأكل اللى هتاكليه دا تانى وميسبكيش غير وانتى جثة هامدة ميتة من الجوع
خامسا .. اشربى شاى اشربى شاى كتيييير على اد ما تقدرى قبل الأكل اشربى شاى وبعد الأكل اشربى شاى وخودى شفطتين فى وسط الأكل لانك بعد الجواز والخلفة كوباية الشاى بالنسبالك حاجة من الاتنين يا هتشربيها ساقعة يا هتندلق عليكى سخنة
سادسا .. قضى نص يومك فى الحمام متستعجليش خودى كتبك وموبايلك وكل حاجتك وقضى الويك إند فى الحمام علشان بعد الجواز والخلفة هتدخلى الحمام بأعجوبة وياريت لواحدك دا هيبقا معاكى عيل جوا واتنين واقفينلك برا الحمام زى ما يكون واخدة تصريح دخول للحمام تحت المراقبة