عاوز ترفعه أكرمه عاوز تذل إنسان هينه

[walaa farouk]

عاوز ترفعه أكرمه ..

عاوز تذل إنسان هينه..

اشتمه ، شهر بيه ، افضحه و هو ما عملش حاجة ..

و الشتيمة مش بس كلمة ، إنما بصة احتقار، تجاهل لكلامه، تشهر بيه و تفضحه و هو بريء ، تشوه سمعته، تكتب له تعليق مهين علي السوشيال ميديا ، تحتقر رأيه، تقاطعه و هو بيتكلم ، تسخر منه و من كلامه أو شكله ، تضحك عليه الناس (تألس عليه ) ، أو تسب عيلته أو دينه أو مذهبه ..

و برضه عاوز تكرم إنسان ارفعه و كرّمه بالذات قدام عيلته و شريك حياته و أولاده و معارفه .. افتكرله حاجة حلوة أو صفة جميلة أو كلمة قالها أو عمل عمله ، و اديله فرصة يتكلم و يعبر عن نفسه..

احترم وجهة نظره و انصت للي بيقوله باهتمام و جدية ، و أخدمه من قلبك و دور علي اللي يفرحه و اعملهوله حتي من غير ما يطلب..

و ياما ناس بتهين و تذل و تعل و تغل ، و ياما ناس بتعين و تعمر و تقدر و تكبر !!