وسيلة ايضاح اداب حضور الكنيسة
نبدأ نسأل الاطفال
عمرك رحت قصر ملك قبل كده؟ هاتتصرف ازاي هناك؟ هل هاتجري وتزعق بصوت عالى؟ هاتزق أخوك وترد بطريقة وخشة على بابا وماما؟ ولو الملك كلمك ماتردش عليه ؟
لأ طبعاً، أنا متأكد انك هاتبقى مؤدب جداً. هاتسمع كلام بابا وماما وتقول "من فضلك" و"شكراً" وتركز انك ماتكسرش حاجة.
سؤال أخير، ليه هاتركز انك تكون مؤدب في قصر الملك، عشان هو شخص مهم؟ وعشان القصر مكان عظيم؟
الكنيسة برده مكان عظيم لأننا بنتعلم فيها عن ربنا ونعبده. صحيح ربنا موجود في كل مكان لكن احنا بنروح الكنيسة عشان نتفرغ لعبادة ربنا من غير ما أي حاجة في العالم تشغلنا.
عمرك فكرت ليه بنغمض عينينا واحنا بنصلي؟
علشان نفكر في الكلام اللي بنقوله لربنا من غير ما نتفرج على الناس والحاجات اللي حوالينا. وبنسجد لله لأنه الملك بتاعنا ويستحق كل اخترام الملك واكتر بكتير كمان!
ازاي نحترم الكنيسة؟
- نسمع كلام مدرسن مدارس الأحد، لأنهم بيتعبوا عشان يجهزوا دروس عشان يوصلوا كلام الله ليكو، وعايزينكم تبقوا أحسن وتقربوا من ربنا أكتر. وهم بيزعلوا لما انتوا مش بتسمعوهم وده بيخلى الله حزين!
- نمشي بهدوء مش نجري في كل مكان
- نتكلم بطريقة مؤدبة وصوت مش عالي
- طبعاً ممنوع الأكل واللبان (أكيد مش هاتعمل كده قدام الملك!)
