روح اخرس أصم

[walaa farouk]

روح اخرس معذب واحد مخليه متقطع ..فى صراع مستمر يتكلم بكلام بايخ مش منطقى (يزبد) .

..متعصب وغضوب متشنج و مصر على رايه (يصر بأسنانه)....كلامه مش بيبنى وفارغ (ييبس)

...ابوه قدمه للمسيح بدموع عنيه عشان يشفيه ....واتعامل معاه يسوع بنظرة من عينه ...
جابته على الارض ..وانتهره ...
وقاله ..ايها الروح الأخرس والاصم ...اخرج
والغريب أن ابوه مكانش قاله غير أن الروح اخرس بس ...
لكن المسيح عرف أن اللى مخلى الواحد كلامه بالشكل ده يبقى اكيد أصم

..لأنه مملاش ودانه حاجة عدله ...فلسانه اتعوج ...
هو احنا هنجيب كلام حلو منين غير لما وداننا تسمع كلام حلو ...
انا وانت لو مش بنسمع كلام ربنا وبننضف وداننا كتير بكلمة الحياة ..وبنقعد مع ناس بتقول كلام ايجابى بناء ...
هنصاب بالحالة دى ...هنزبد ونصر باسناننا ونيبس ...
وكتير هنترمى فى المية او فى النار وهنبقى سبب لعنة للى حوالينا ...ده غير أننا مش عايشين اصلا ...
وساعتها عشان نقوم لازم نموت ونستسلم لنظرة عنيه و صوته اللى يرعد ابليس الأخرس الأصم اللى جوانا ...ولما نبقى مايتين ومعندناش طاقة نقاوم ...ساعتها هيمسك ايدينا ويقومنا وساعتها هنقوم...
محتاجين نسمع كلمته عشان الطرش يروح وساعتها عقدة لساننا تتفك ونقوم ...
اللى مش بيسمع الكلمة ولا بيقراها ولا بيذاكرها للاسف ميت وفيه روح اخرس أصم ...
انتهر يارب الروح الأخرس الأصم اللى جوايا