ساعد نفسك بنفسك

[walaa farouk]

10 قواعد لزواج ناجح .. 30 ثانية عشان تبقى حد مشهور .. 3 اسرارعشان تبقى شخص غنى .. 40 قانون للحب الحقيقى .. 90 جملة تحفظها وهاتودع الاكتئاب .. 30 كتاب لو قريتهم تبقى مثقف .. 9 طرق للهجرة لامريكا وكندا .. 28 مبدأ للسعادة الحقيقية .. الطريقة المعجزية للتخلص من الدهون والترهلات .. 7 طرق لكيفية حرق صينية المكرونة بالبشاميل
مافيش حد فينا ماشافش الكلام ده واتحركت مشاعره من جواه او حتى فضوله انه يروح يشوف ازاى ممكن بسهولة الحاجات ديه تتحقق .. وللأسف ولا اى اندهاش .. والحكمة بتقول الغباوة انك تكرر نفس الطريقة اللى انت جربتها قبل كده وفشلت دشيليون مرة
ده ببساطة لان اللى بيجى بسهولة بيروح بسهولة .. ثم ازاى مثلا هاتكون حد غنى وانت مستعد تغيب عن شغلك عشان ماتش الاهلى واسمنت قنا .. ولا ازاى هاتبقى فى زواج ناجح وانت شايف ان الزواج اصلا مؤسسة فاشلة .. ولا ازاى هاتعرفى تطبخى وانتى اصلا بتخافى تولعى البوتجاز لايولع فى وشك .. ولا ازاى هاتطلع من اوائل الجمهورية وانت مقضيها شات وبلاى استيشن طول الليل .. البوست السحرى ده ابو 12 خطوة هو اللى هايشقلب حياتك بقى
النجاح فى اى حاجة مش واحد اتنين تلاتة تمشى عليهم وتبقى تمام وزى الفل .. هى مش روشتة دكتور لعيان .. لكن النجاح بيبتدى من جواك انت اللى بتقع وتجرب وتفشل 500 مرة لحد ماتعرف طريق النجاح ده .. لان مافيش طريقة واحدة تنفع لكل الناس والا كانت كل الناس عاشت سعيدة او كل الناس بقت اغنياء او كل الشباب بقى محترم وبطل تحرش او كل البنات بقت تتجوز اللى بتكراش عليه
لو دورت على كل الناجحين فى حاجة هاتلاقى وراهم قصة كفاح مريرة وصعبة .. هاتلاقى سنين صبر وكفاح وأمل وطموح واحباط وفشل ويأس ونجاح .. احنا بنضحك على بعض بكلمتين وفهلوة .. زى بالظبط خد البرشامة ديه وهاتبقى كويس طب ياعم ديه بتاعت ايه ؟ .. خدها بس وهاتبقى امور .. طب اسمها ايه ؟ .. خدها وهاتدعيلى .. او نفس الحكاية فى السنترات وملازم المراجعات النهائية اللى لما تحفظها وتدخل تصمها تطلع من الاوائل ده لو ذاكرتها اصلا
النجاح بقى مش برشامة تخليك احسن ولا برشام كاتبه هايخليك تغش وتنجح .. قصص النجاح اصحابها هما اللى بيكتبوا طريقها .. ممكن اللى سبقونا يكونوا مصدر إلهام لكن مش خريطة كنز .. ممكن جملة تحمسك او قصة تكون مصدر شغفك .. لكن بوستات واحد اتنين سردى مردى انت حكيم ولا تمرجى ديه فكك منها .. انت شخص مميز عشان كده طريقك هايكون مميز ونجاحك هايكون مميز انت مش شبه حد تانى <3
- لو انت مش هاتساعد نفسك ماحدش تانى هايقدر يساعدك -