أسكتش عيد القيامة للأطفال
فرفورة: ازيك يا بوبوس عامل ايه
بوبوس : ازيك يا فرفورة
فرفورة : مالك كده مش على بعضك وقلقان ....
وايه الى انت ماسكه فى ايدك ده
بوبوس : مش عارف اقولك ولا لا
فرفورة : تقولى عليه ايه هو فيه ايه بجد
بوبوس : انا عايز اقولك على حاجة بس انا عارف انك مش هتصدقينى
فرفورة : لا متخافش هصدقك ها يالاه قول فيه ايه
وبوس : مش عارف ابتدى منين
فرفورة : يعنى ايه تبتدى منين انت هتخطب
بوبوس : اصلى انتى مش عارفه حاجة
فرفورة : طب عارفنى احسن انا قربت اتشل منك ها قول وخلص
بوبوس : بصى يا سيتى انا كنت عايز اصلح الكرسى بتاعى لانه اتكسر فقلت لما ادور على حته خشب علشان اصلحه بيها فبابا قالى انى اكيد هلاقى الخشب الى انا عايزه فى كارتونه كبيرة كنا حاطين فيها الحاجات القديمة قوى والى مش بنستعملها
فرفورة : ها وبعدين صلحت الكرسى ولا لا
بوبوس : انا جايلك اه فى الكلام لما فتحت الكرتونه عشان ادور على الخشب الى انا عايزة لقيت الصندوق الى فى ايدى ده ولقيت معاه الورقة ديه
فرفورة : الف مبروك على الصندوق
بوبوس : انتى بتتريقى عليا صح انا غلطان اساسات انى بتكلم معاكى
فرفورة : خلاص معلش كمل ماله الصندوق الى من ايام نفرتيتى ده
بوبوس : اخدت الصندوق ووريته لبابا راح قالى انى الصندوق ده كان بتاع جدى
فرفورة : راح حكالك قصة جدك
بوبوس : اديكى رجعتى تتريقى تانى
فرفورة : اصلك عمال تقولى صندوق وجدو وبابا اختصر انا عايزه المهم ماله الصندوق الى عاملك ازمة
بوبوس : لقيت معاه ورقة مكتوب فيها لو فتحت الصندوق وقلت الكلام ده هتنقلك لاى مكان كنت بتفكر فيه
فرفورة : ههههههههههههه هههههههههههه هههههههههههه هههههههههه
بوبوس : ايه ده انتى بتضحكى عليه
فرفورة : ههههههههههههههههه انت عايزنى اصدق الكلام ده لا بس بجد عرفت تضحك عليا
بوبوس : على فكرة انا مش بضحك عليكى انا كل الكلام الى قولتهولك صح
فرفورة : اه انت هتقولى وبعدين هتطلع الساحرة الشريرة وتاخدنا على المقشة وفووووووه تطير بينا على مدينة الاقزام
بوبوس : على العموم اتريقى براحتك انا اساسا مكنش المفروض احكيلك حاجة
فرفورة : اصل الكلام الى بتقوله محدش يصدقة
بوبوس : خلاص انسى كل الى انا قولتهوليك اعتبرينى مجنون وكنت بكلم نفسى
فرفورة : خلاص متزعلش منى انت مش معاك الورقة والصندوق
بوبوس : اه
فرفورة : خلاص مش هنخسر حاجة لما نجرب ونشوف الكلام ده حقيقى ولا لا
بوبوس : خلاص انا موافق
فرفورة : هو ايه الكلام الى المفروض نقوله لما نفتح الصندوق
بوبوس : الكلام الى المفروض نقوله ادمانتوا الا بوتا اكوستوا الا كوتا
فرفورة : هههههههههههههه ههههههههههه هههههههههههه
بوبوس : خلاص انسى الكلام الى انا قولتهوليك وانا اساسا غلطان انى حكيتلك حاجة
فرفورة : لا خلاص يا بوبوس انا بجد مش هضحك تانى ، ياله زى ما اتفقنا احنا نجرب ونشوف الكلام صح ولا غلط
بوبوس : طيب انا هفتح الصندوق واحنا الاتنين نقول الجملة مع بعض
فرفورة : ماشى ياله
فرفورة و بوبوس : ادمانتوا الابوتا اكوستو الاكوتا
المشهد الثانى(وبوبوس وفرفورة ينتقلوا لمكان القيامة )
فرفورة : ايه ده يا بوبوس ده باين الحكاية طلعت صح
بوبوس : الظاهر كده يافرفورة مش انا قولتلك وانتى كنتى عمالة تتريقى عليا
فرفورة : طيب هنعمل ايه دلوقت وايه المكان الى احنا فيه
بوبوس : مش عارف بس الورقة بتقول ان اخر حاجة كنا بنفكر فيها هنتقل ليها
فرفورة : طيب انت كنت بتفكر فى ايه ؟
بوبوس : انا كنت بفكرههعمل ايه فى العيد وهصلى القداس فين
فرفورة : طيب افرح بقى اديك هتقضى العيد فى الصحرا فى مكان منعرفوش
بوبوس : بس بجد انا عايز اعرف ايه علاقة المكان ده بالعيد
فرفورة : انا عارفه بقى يادى الحوسه الى احنا فيها
بوبوس : خلاص انتى هتعدى تولولى خلينا نشوف هنعمل ايه
( دحرجة حجر ورياح شديدة )(موسيقى السامرية)
مريم : ايه ده مين الى حرك الحجر وفين جسد المسيح اكيد اليهود سرقوه (تبكى) طيب انا اعمل ايه دلوقت الملاك : انتى بتعيطى ليه
مريم : اصل الجسد الى كان موجود فى القبر ده حد خده ومعرفش وداه فين(ظهور المسيح من خلف مريم المجدلية)
لمسيح : يا امراة انتى ليه بتبكى وعايزه مين
مريم : انا بدور على جسد يسوع المسيح الى كان موجود فى المكان ده فلو كنت انت اخده ياريت تقولى واديته فين وانا اروح اجيبه
المسيح : يامريم
مريم : ايه ده ربى يسوع المسيح : اوعى تلمسينى انا لسة مصعدتش للسما لكن عايزك تروحى تبلغى التلاميذ انى قمت من بين الاموات
مريم : امرك ياربانا هروح ابلغهم حالا
(المشهد الثالث)(يختفى المسيح وتتحرك مريم فى اتجاه بوبوس وفرفورة)
بوبوس : لو سمحت هو مين ده الى كان بيكلمك
مريم : انتوا مين الاولب
وبوس : انا بوبوس وديه فرفورة
مريم : وايه الى جابكم هنا
بوبوس : ديه حكاية يطول شرحها لكن احنا كنا عايزين نعرف مين الى كان واقف معاكى
مريم : ده رب المجد يسوع المسيح انا كنت فاكره ان حد سرق جسده او خده من القبر بتاعه لكن طلع ان السيد المسيح انتصر على الموت وقام من بين الاموات
فرفورة : طيب انا كنت عايزه اعرف
مريم : انا معنديش وقت اضيعه معاكم اكتر من كده انا لازم اروح افرح كل الناس
فرفورة : بس كنا عايزين نعرف حاجة كمان
مريم : بقولك انا لازم امشى دلوقتى
فرفورة : طيب انتى مين
مريم : انا مريم المجدلية
(المشهد الرابع)(مريم تختفى)
فرفورة : انا لسه بردوا مش فاهمه حاجة ومين الى دحرج الحجر ده
بوبوس : انتى شايفه الراجل الى هناك ده
فرفورة : اه بوبوس : ما تيجى نساله احنا فين وايه ال والنور الى حصل ده
فرفورة : تعالى
بوبوس : لو سمحت كنا عايزين نعرف ايه المكان ده الى احنا فيه
الملاك : انتم فى اورشليم فى بستان يوسف الرامى
بوبوس : اورشليم
فرفورة : عجبك كده ياسى بوبوس الصندوق بتاعك ودانا لفين
بوبوس : وانا كنت اعرف انه حقيقى لكن ايه ال الشديد الى سمعناه من شوية وكمان كان فيه نور جامد قوى
الملاك : اصل النهاردة حصل اعظم حدث فى الدنيا كلها النهاردة قام رب المجد يسوع
فرفورة : اه انا كنت فهمت يا بوبوس الى حصل ان انت فكرت فى العيد عشان كده احنا اتنقلنا لمكان قيامة السيد المسيح
الملاك : كلامك مظبوط يا فرفورة
بوبوس : لكن انت مين
الملاك : انا الملاك الى دحرجت الحجر
فرفورة : اه عشان بابا يسوع يطلع من القبر
الملاك : لا طبعا يا فرفورة باب يسوع مش محتاج لحد انه يفتحله القبر ده هو ربنا ويقدر يعمل كل حاجة وعلى فكرة يا فرفورة بابا يسوع قام والقبر مقفول يعنى قبل ما انا افتحه
بوبوس : طيب انت ليه دحرجت الحجر من على القبر طالما بابايسوع قام والقبر مقفول
الملاك : عشان يا بوبوس كل الناس تعرف ان بابا يسوع قام وانه مش موجود فى القبر ...انتوا شايفين الختم ده
فرفورة و بوبوس : اه شايفينه
الملاك : الختم ده محطوط عشان محدش يقرب جنب القبر او يشيل الحجر
بوبوس : وده مين الى حاطه
الملاك : الرومان الى صلبوا باب يسوع يا بوبوس
بوبوس : اشمعنا يعنى
الملاك : عشان كانوا خايفين لحد يدخل ويسرق جسد باب يسوع عشان كده حطوا الختم ده
فرفورة : اه انا اعرف كمان انهم كانوا موقفين حرس عند القبر
الملاك : مظبوط يا فرفورة
فرفورة : لكن هما فين
الملاك : الجنود دول اول ما سمعوا ال الى انتوا سمعتوه كلهم خافوا وهربوا
فرفورة : ياه انا مش مصدقة انى واقفة عند القبر الى دفن فيه السيد المسيح
الملاك : لا يا فرفورة صدقى هو ده القبر الى ادفن فيه بابا يسوع 3 ايام
بوبوس : انا مبسوط جدا انى جيت للمكان الى ادفن فيه المسيح والى حصلت فيه القيامة
فرفورة : بوبوس احنا اتاخرنا قوى المفروض نرجع دلوقتى
بوبوس : عندك حق يافرفورة طيب احنا متشكرين خالص على الكلام الجميل الى قولتهولنا
الملاك : متشكرنيش انا لكن المفروض تشكر ربنا على انى رضى يتحمل الصلب والاهانات وكل التعذيب الى مر بيه عشان يغفر خطايا كل الناس وكمان قام من الموت عشان يفرح كل الناس ويعرفهم انه اله قوى ويقدر ينتصر على كل حاجة حتى لو كان الموت
بوبوس : كلامك صحك احنا لازم دايما نشكر ربنا على كل الى عمله عشنا والى لسه بيعمله لينا
(المشهد الخامس)الملاك يختفى
فرفورة : ها دلوقتى هنرجع اذاى يا سى بوبوس
بوبوس : هنرجع ذى ما جينا الصندوق اهو معانا
فرفورة : اه بس انا نسيت احنا كنا بنقول ايه
بوبوس : تصدقى وانا كمان
فرفورة : لازم نفتكر يا اما كده مش هنعرف نرجع تانى
بوبوس : كنا بنقول ايه يارب
فرفورة : استنى انا افتكرت احنا كنا بنقول قوطه الافوطه بناست .....
بوبوس : بس بس متكمليش ايه قوطه فوطه دول جبتيهم منين
فرفورة : احنا مش كنا بنقول كده بوبوس : خلاص بس انا مش عايزك تفكرى فى حاجة تانى خلينى اركز بقى
فرفورة : طيب ركز شكلنا هنفضل هنا
بوبوس : ايوة انا افتكرت ادمانتوا الابوتا اكوستو الا كوتا
فرفورة : ياسلام عليك ياواد يا بوبوس
بوبوس : ياله احنا هنقول سوا
فرفورة و بوبوس : ادمانتوا الابوتا اكوستو الا كوتا
(المشهد السادس)
فرفورة : ايه ده احنا رجعنا تانى
بوبوس : بس بجد كانت رحلة رحلة جميلة جدا
فرفورة : انا مبسوطة قوى انى شوفت السيد المسيح ومريم المجدلية والملاك وكمان القبر الى دفن فيه السيد المسيح
29 - 04 - 2016, 02:13 PM
العرض المتطور