|
 |
 |
 |
|
رقم المشاركة : ( 1 )
26 - 07 - 2012, 05:35 PM
|
|||||||||||
|
|||||||||||
 الشخصيات: البقرة ريرى – الخروف روفى – ماما العدزاء – الطفل بابا يسوع – يوسف النجار- الرعاة والمجوس الفكرة: البقرة تحكى للخروف عن حدث عجيب حصل عندهم فى المزود وهو ولادة طفل مهم جداً، السماء والأرض احتفلت به المسرحية ريرى: (تتمطع) صباح الخير يا روفى روفى: صباح الخير يا ريرى، مالك يعنى صاحية بدرى مش عوايدك ومالك شكلك تعبانة كدا ليه؟؟ زى ما تكونى اشتغلتى كتير إمبارح ريرى: صحيح يا روفى انا صاحية بدرى لكن جسمى مكسر خااااالص، اصلى طول الليل مانمتش عمالة افكر فى اللى حصل امبارح روفى:ايه اللى حصل؟؟ ايه دا ..... ايه الصوت اللى عندك دا .... دا صوت طفل صغير.... ورينى كدا دا فيه كمان مامته معاه ومين الراجل الكبير دا معقول؟؟ باباه؟؟ ... اوعى يا ريرى خلينى اشوف.... حاسب يا روفى حاسب ح توقعنى، اصبر شوية ما انا لسه كنت ح احكى لك عاللى حصل .... دى حكاية ليها العجب ااااااااه عشان كدا بتقولى ما نمتيش امبارح؟؟ احكى لى بسرعة.... هى الست دى ايه اللى جابها هنا تولد عندكوا؟؟ هى ما عندهاش مكان ولا اهل تولد عندهم؟؟؟ طيب ماحدش كان معاها؟؟؟ والراجل الكبير دا جوزها ولا باباها؟؟؟ وانتوا عملتوا ايه؟؟؟؟ ما تتكلمى يا ريرى ساكتة ليه؟؟؟ ييييييييه يا روفى هو انت مدينى فرصة اتكلم؟؟؟ عمال تسأل تسأل ومش مخلينى حتى اعرف ارد عليك .... بعدين عيب كدا تقعد تبص على الناس بالشكل دا.... يووووووه حاسب يا روفى، تعالى معايا وانا ح احكى لك كل حاجة. احكى لى بسرعة وانا ح اسكت اهه (ويضع يده على فمه) بص يا سيدى احنا امبارح ، انا واصحابى البقر والخرفان كنا قاعدين فى أمان الله بناكل ونلعب لحد ما فجأة لاقينا الست دى وهى حامل ومعاها الراجل العجوز دا داخلين عندنا وكانت تعبانة خالص وشكلها خلاص ح تولد، روحنا كلنا وسعنالهم عشان يدخلوا – بس بينى وبينك يا روفى كنا مبسوطين بيهم قوى، اهه حد ح يونسنا ونونو جديد عندنا نلعب معاه حاجة ،أول مرة تحصل لنا وسمعناهم بيقولوا:........ موسيقى تخيل وتختفى البقرة والخروف وتظهر ماما العدرا و يوسف النجار يوسف النجار: معلهش يا مريم على مهلك اتسندى علىَ مريم: معقول يا سيدى، البيبان كلها تتقفل فى وشنا وماحدش راضى ياخدنا عنده عشان اولد وفى عز البرد دا مش قادرين بس يستحملونا حبة صغيرين؟!! يوسف: معلهش يا حبيبتى انتى عارفة انه اللى اداكى النونو دا ح يقدر ازاى يحافظ عليكى، بس انا مش لاقى حته ترتاحى فيها، بصى معلهش انا ح انظف لك المزود دا عشان تقعدى فيه وترتاحى. معقول!!! معقول رب المجد يتولد فى مزود للبقر؟؟؟ فى المكان اللى البقر بياكل فيه!!! معلهش يا رب طبعا المكان دا مايليقش بيك ابدا يا ملك الملوك لكن اكيد انت اللى عايز كدا. تختفى ماما العدرا وسيدنا يوسف النجار ويظهر تانى روفى وريرى: روفى: ايه دا ... ايه الكلام الغريب اللى انتى بتقوليه دا يا ريرى؟؟ رب المجد ؟ وملك الملوك؟؟ طب ازاى الملك ح يتولد فى المكان اللى انتوا بتاكلوا فيه اللى هو المزود؟؟ ماهو دا اللى احنا ماكناش فاهمينه بس انت لو صبرت شوية كمان ح تعرف باقى الحكاية الغريبة الست دى اسمها مريم بعد ما ولدت كلنا قعدنا نهيص ونتنطط من الفرحة، بس يا روفى جابت حته نونو انما زى القمر وشه جميل قوى وهادى ومجرد بس ما تبص فى وشه ترتاح قعدنا نلف حواليهم واحنا فرحانين خالص اصل مامته كمان هادية قوى ووشها كمان جميل وأمورة خالص وشكلهم ناس طيبين قوى وغلابة. يااااااااه بس فين اهلهم يا ريرى؟؟ بردو ما قلتيليش وماقلتيش كمان ازاى الطفل دا ملك الملوك؟؟ وازاى يتولد فى مزود البقر الحقير بتاعنا بص يا روفى احنا بصراحة عرفنا دا كله بعد ما مريم ولدت إزاى؟؟ بعد شوية واحنا كلنا عمالين نتفرج على النونو وجماله لاقينا المجوس جايين عندنا عشان يباركوا للطفل دا وجايبين معاهم هدااااايا كتيييييييييير خاااااااالص عشانه استنى استنى يا ريرى يعنى ايه مجوس مش تفهمينى واحدة واحدة!! بص يا روفى المجوس دول ناس بيهتموا بالفلك وبيدرسوا النجوم والكواكب اسمهم مجوس...... موسيقى التخيل ويختفى روفى وريرى ويظهر المجوس الثلاثة مساء الخير يا جماعة احنا المجوس جايين من آخر الدنيا عشان نبارك للطفل دا ملك الملوك ورب الأرباب، طبعاً انتوا مستغربين احنا عرفنا منين؟؟؟الملك هيرودس قاللنا ان فيه طفل ملك الملوك ح يتولد بس ما كناش عارفين مكانه فين وقاللنا ان اللى ح يجيبهوله ليه مكافأة كبيرة واحنا قاعدين نبص للسما وندرس النجوم لاقينا فجأة نجمة كبيرة قوى وقريبة قوى وعرفنا ان دى نجمة الملك هو فين ملك اليهود دا أحنا جايبين له هدايا دهب ولبان ومر، بس على فكرة احنا مش ح نرجع تانى لهيرودس نرجع تانى للخروف والبقرة اشمعنى يا ريرى دهب ولبان ومر هو النونو ح ياكل لبان؟؟؟ والمر دا عشان ايه مش المفروض يجيبوا له حاجة حلوة والدهب طبعا عشان يتسيغ....يا عم يا عم ........ يا بخته يا روفى يا حبيبى استنى ادينى فرصة اشرح لك انا سمعت المجوس امبارح بيشرحوا الحاجات دى الدهب لأنه ملك الملوك واللبان دا بيرمز للكهنوت لأنه كمان سيد على كل الكهنة أما بقى المر فدا عشان الصليب وعذاباته. ااااااااه انا كدا فهمت دا فعلا بقى ملك الملوك وبعد شوية كمان يا روفى لاقينا الرعاة جايين مين دول كمان؟؟؟ دول الرعاة يا روفى اللى بيرعوا الغنم والخرفان اللى زيك وهما كمان يا ترى ظهرت لهم نجمة ولا عرفوا منين؟؟؟ وجابوا له هدايا ايه هما كمان؟؟؟؟ اسمع يا روفى اللى حصل..................... (تقول بصوت واطى بينها وبين نفسها دا انت رغاى قوى يا روفى ) ايه؟؟؟ بتقولى حاجة يا ريرى؟؟؟؟ لا يا روفى آه بحسب موسيقى التخيل ويظهر الرعاة أهلاً أهلاً بملك الملوك والمخلص هو دا المسيح الرب، أصل احنا واحنا بنحرس الخرفان بتاعتنا فجأة ظهر لنا ملاك من السما ولاقينا نور جامد قوى فخفنا جداً واتخصينا لكن هو قاللنا بصوت جميل: صوت من الخلف وكأنه الملاك "لا تخافوا فها انا أبشركم بفرح عظيم يكون لجميع الشعب انه ولد لكم اليوم في مدينة داود مخلص هو المسيح الرب و هذه لكم العلامة تجدون طفلا مقمطاً مضجعا في مذود " وكمان ظهر معاهم ملايكة كتير قوى وقالوا بصوت حلو قوى: " المجد لله في الاعالي و على الأرض السلام و بالناس المسرة". قلنا لنفسنا لازم نروح بيت لحم على طول وآهه ادينا لاقيناه – الحمد لله نرجع تانى للخروف والبقرة وبعدين يا ريرى دى حكاية غريبة خالص يعنى دا هو المسيح طيب ماعرفتيش سموه ايه؟؟؟ لسة يا روفى بس انا سامعة مامته بتقول ان الملاك كان جه بشرها وقاللها ح تسميه يسوع الملاك بشرها؟؟؟ يعنى اللى معاها دا مش هو جوزها؟؟ لا يا روفى دا ربنا هو اللى ادالها النونو الجميل دا واللى معاها دا اسمه سيدنا يوسف النجار وهو خطيبها مش جوزها. ياااااااه دى حكاية غريبة جدااااااااا انتى عارفة يا ريرى احنا المفروض نعمل ايه؟؟ ايه يا روفى؟؟؟ المفروض نقعد معاهم ومانسيبهمش ابداً إحنا مش أقل من الرعاة والمجوس اللى جم من آخر الدنيا عشان يباركوالهم أحنا مش ح نسيبهم خاااااااالص لحد ما مريم تقوم بالسلامة وح نلعب مع النونو وندفيه بالصوف بتاعنا وكل حاجة، إيه رأيك يا ريرى؟؟؟؟ طبعاً موافقة يا روفى ياللا بينا نلعب معاهم بس من غير ما نضايقهم. ياللا بينا................... ويجروا سوى ويختفوا 
|
 |
|
| قد تكون مهتم بالمواضيع التالية ايضاً |
| الموضوع |
| مسرحية عيد القيامة - للأطفال |
| إسكتش عرائس بابيتس لشرح درس مدارس الأحد عن التسامح |
| مسرحية: الحل إيه؟؟! (للأطفال) |
| إسكتش عرائس لشرح درس مدارس الأحد عن التسامح |
| عرائس للأطفال مخيفة جداً |
العرض العادي
