توحد الاطفال

[توتا كمال]

أنا مش غريب الأطوار، أنا بس مختلف.
أنا عندى توحد.
عقلى بيشتغل بطريقة مختلفة عشان كده تصرفاتى ممكن تكون غريبة عليكوا.
لغة الجسد بتاعتى مختلفة، حاولوا تتفهموها و تفهموا سلوكى و الطريقة اللى بعبر فيها عن نفسي عشان رد فعلكوا بيفرق معايا.
أنتوا كمان طريقتكوا غريبة عنى و مختلفة أوقات ما بفهماش حاولوا تختاروا طريقة أقدر أفهمها.
أنا مش منطوى أنا بس بحتاج أبقى لوحدى أوقات، بس بحبكوا تكونوا حواليا عشان أنا بحب أحس أنكوا بتدعمونى من غير ضغط عليا.
أنا مقدرش استحمل الأفكار الكتير اللى ممكن تبقى فى عقلى، و لا المشاعر المتلخبطة الكتيرة اللى ممكن احس بيها فى وقت واحد، مقدرش استحمل الناس اللى مش فاهمانى و بتحاول تخلينى شخص تانى او تغير من سلوكى بدل ما تفهمه، عشان كده بحب أوقات أبقى لوحدى فى العالم بتاعى اللى مش بيخوفنى و لا بيضغط عليا أبقى حد تانى غير نفسي.
أنا متميز، بحب أكون نفسي، بحب إختلافى، بس للأسف مش دايما سهل إنك تكون مختلف، عشان كده محتاج تتقبلوا إختلافى و تفهموه. الحياة أسهل لما الناس تتفهم الإختلاف، حبونى زى ما أنا
و إقبلونى كده ، أنا بحبكوا زى ما أنتوا ❤

[walaa farouk]

ميرسي علي مشاركتك المثمرة
ربنا يفرح قلبك

[Mary Naeem]

مشاركة جميلة جدا
ربنا يبارك حياتك