القديسة مارينا شالت البقع كلها بالكامل
النهارده انا جايه وهحكيلكم معجزة مش سمعتها من حد ولكن المعجزة دي حصلتلي انا ولسه حالا في عيد القديسة مارينا اللي كان في شهر 7 ده
الحكايه بدئت السنه اللي فاتت زي اليومين دول بدئت تظهر بقع لونها ابيض في ايدي اليمين (من عند الكتف) ولما روحت لبنت عمتي(دكتورة امال) قالتلي هنتابعها لو بتكبر او شكلها بيتغير ومكانتش بتتغير وكانت ثابته فمخدتش ليها اي علاج وقالتلي ان تغيير لون الجلد ده ممكن يبقي ناتج عن زياده عدد كرات الدم البيضا عن الحمرا بس مقولكوش ده كان ماثر علي نفسيا ازاي
بعدها بفتره بدئت البقع دي تزيد وانتشرت في ايدي الاتنين وبعدين ابتدي يتحول لون البقع دي من الابيض الي البني الغامق فروحت لدكتورة امال وادتني نوع مرهم الكلام ده كان في شهر يونيو 2011 وقعدت ادهن منه طول شهر 6 ولغايه نص 7 ورجعت البقع دي للون الابيض مره تانيه بس كانت بتكبر وتنتشر في ايدي لدرجه اني كنت بتكسف البس حاجه نص كم وبجد كانت مؤلمة نفسا جدا
قبل عيد القديسة مارينا كنا بنتفق خدام المنتدي اننا نروح نحضر العشية هناك في حارة الروم ومتفقناش فانا قررت اني اروح لوحدي ليله عيدها ولان ليله عيد القديسة مارينا كانت جمعه وكانت في مظاهرات في البلد كتير كمان كانت اخر ليله قبل رمضان فالعتبه كانت زحمه جدا فماما مرضيتش تخليني انزل وقالتلي مش هتروحي وقعدت اقنعها بالعافية لغايه لما خدتها معايا علشان تبقي مطمنه
روحت هناك واخدت بركة كف القديسة مارينا وقررت اني مش هستخدم العلاج تاني واني هدهن بداله من زيت القديسة مارينا وفعلا بقيت ادهن من زيتها علي البقع دي وصليت لها وقولت الموضوع ده بتاعك انا مش هدهن عليها اي مرهم تاني
المهم بعدها بكام يوم كنت لابسه بلوزة بنص كم فبنت من الاسقفيه اخدت بالها من البقع دي وسالتني ايه ده وقالتلي ان هي كامن كان عندها حاجه زي كده وان مافيش دوا جاب معاها نتيجه وان حد من قرايبها جابلها صبغه من امريكا وهي اللي قضت علي الموضوع ده وقالتلي تجيبلي منها وانا قولتلها لا انا مش هدهن اي حاجه تانيه غير زيت القديسة مارينا
وقعدت البقع دي تبهت تبهت لغايه لما رجعت تاني للون الجلد الطبيعي ببركة زيت القديسة مارينا حبيبتي وشفاعتها الكبيره اللي بجد انا مستحقش اني اخدمها واكون بنتها
والنهارده انا جايه اقول علي المنتدي كله واحده من عجايبها الكتير اللي بتعملها معايا بس انا وعدتها ان لما تشيل البقع دي اني احكي لكل المنتدي عن الحاجات الحلوة اللي بتعملها معايا
بركة صلاتها تشملنا كلنا امين
