أحذر قابل للكسر 💔

[walaa farouk]

اي حد هيسافر بالطيارة ✈️ عارف انه وهو بيسلم الشنط بتاعته
.. لو معاك حاجه في الشنط ممكن تتكسر
لازم تبلغ وتوضح للموظف المسؤول انه معاك حاجات ممكن تتكسر
. ويلزق علي الشنطة العبارة اللي في الصورة ( قابل للكسر )
اذا كان ده بيتم في رحلة طيران
عشان نضمن سلامة الوصول لنفسنا وللحاجات اللي معانا.
في رحلة حياتنا كمان محتاجين نوضح ونشرح
للناس اللي بنحبهم انهم يخلوا بالهم اننا قابلين للكسر
وعادي بننجرح ومش جامدين قوي ولا حاجه.
. لأننا بنادمين مش قطع حديد.
لسلامة وصولك وعشان رحلة حياتك مايكونش فيها مشاكل كبيرة
.. وكفاية العوامل الخارجية اللي مش بتخلص
وبتبقي غصب عن إرادتك ..
مش عيب انك توضح انك بتزعل من كذا وبتتضايق من كذا.
ولو اللي بتوضحلهم بيحبوك دايماً هيخلوا بالهم.
اما الناس اللي ممكن تعرف اللي يزعلك او يجرحك وتعمله او تدوس باستمرار بكلام جارح.. من الأفضل تقضي رحلة الحياة
من غيرهم هتكون أفضل واكتر راحة.
مش عيب اننا نوضح ضعفنا..
مش هيقلل مننا اننا نحكي ونقول..
كل واحد فينا له كتالوج مختلف لازم يوضح ويعبر عن اللي بيفرحه
او اللي ممكن يكسره.
احنا مش حديد. احنا بنزعل وبنفرح وبننكسر عادي.
وحاجات كتير لما بتنكسر فينا مش بتتصلح..
احنا بنادمين قابلين للكسر 💔