مديونين لربنا وللناس اللي بتحبنا

[walaa farouk]

الفنانة الجميلة ياسمين عبد العزيز
كانت بتحكي عن الأزمة الصحية اللي مرت بيها..
وقالت إن الدكاترة وصلوا لمرحلة كبيرة
من اليأس والإحباط إنها تقوم تاني بالسلامة..
وكمان التُربي بعت لها رسالة وقالها:
إحنا جهزنا القبر بتاعك..
وهي على السرير في المستشفى
كانت بتشوف أمعائها برة جسمها.
وأنا بسمع الكلام ده حطيت نفسي مكانها للحظة..
وحسيت أد أيه الإنسان ده ضعيف جداً قصاد المرض،
وإزاي إن الحياة ممكن تنتهي
نتيجة خطأ غير مقصود من ناس حوالينا..
لكن على الرغم من صعوبة الكلام
والموقف اللي هي مرت بيه..
إلا أني اتشجعت بحاجتين من كلامها..
الحاجة الأولى.. إن ربنا ممكن يتدخل
في لحظة ويغير المشهد تماماً..
مهما كانت الظروف صعبة والأمل ضعيف والواقع مخيف،
إلا إن ربنا بيقدر يشتغل عكس توقعاتنا وأفكارنا..
وتفضل الكلمة الأخيرة في حياتنا لله وحده..
والحاجة التانية أنها اتكلمت عن وجود ناس حواليها
بتحبها وخايفة عليها وبتدعي لها..
والحقيقة إن الإنسان في وقت الألم بيحتاج
لدعم من الناس مش من ربنا بس..
كلنا مديونين لوجود ناس بتحبنا وتسندنا في حياتنا،
مش مهم يكونوا ناس كتير على أد ما يكونوا ناس حقيقية،
مهما يكون ألمك وحزنك ويأسك..
خلي عندك ثقة إن الله قريب ومتداخل معانا في ألمنا..
ويقدر يشتغل بطريقة تفوق توقعاتنا..
ومتنساش إنك محتاج دعم واحتواء
من كل الناس اللي بيحبوك..