ليه بتقرب من ربنا؟
فكرت قبل كده ليه بتقرر تقرب من ربنا وتروح الكنيسة؟!
أنا من الشخصيات اللي علطول بيروحوا الكنيسة وملتزمين أوي بحضور كل الاجتماعات وموبايلي فيه ترانيم كتير وحافظ أيات كتير طبعاً لأني ملتزم في كنيستي، لكن …..
الصدمة
كل مرة كانت بتحصلي مشكلة أول حاجة كانت بتيجي في دماغي هي الأيات اللي حافظها وبقولها كتير لغاية ما المشكلة تعدي، وكنت ببين للناس أني راضي، مع إني من جوايا كنت ببقى مضايق وكان جوايا أسئلة بس مخبيها والأسئلة دي ظهرت في حياتي أوي وبانت بوضوح أول ما حصلت كذا مشكلة في حياتي مع بعض وقتها قعدت أقول لربنا أنت مش بتشوف أنا بعمل علشانك إيه، أنا كان ممكن أعيش زي شباب جيلي لكن أخترت إني أعيش معاك مختلف وأنت مش مقدر ده وسايبني بغرق في المشاكل، مش بس كده ده أنت حتى مش بتعملي حاجة تفرحني زي الناس اللي عايشين بعيد عنك وعلطول فرحانين، ساعتها بدأت أتصدم في نفسي، وبدأ يجي جوايا سؤال هو أنا عايش مع ربنا ليه؟
عيد حساباتك
بعد وقت طويل من التفكير والتحليل بدأت أفهم أني ممكن أكون عايش مع ربنا مستني عطياه مش علشانه هو وده بان مع الوقت الصعب، شفت الأخ الأكبر للأبن الضال في المشهد وكأني عملت زيه وبدأت ( أعاير ) ربنا بقربي منه وخدمتي ليه، وكأن ده فضل مني، وأول ما تحصل حاجة متعجبنيش أبدأ ألومه كأنه متهم، وانسى أن المفروض علاقتي بيه متبقاش مبنيه على مواقف، ساعتها بدأت أعيد حساباتي وأراجع نفسي وأشوف أنا هنا ليه؟ هو أنا عايز أكرم ربنا وأخدمه علشانه ولا ليا أهداف تانية؟
لو مش عارف أنت هنا ليه، وسؤال أنت بتتبع ربنا وبتخدمه وبتعمل كل ده ليه صدمك فأنت محتاج تفكر وتراجع نفسك وتقف وقفة مع نفسك تقرر فيها أنت عايز تعمل ايه؟!
29 - 07 - 2018, 10:15 PM
رد: ليه بتقرب من ربنا
العرض العادي
