لما شريك حياتك يبقي صعب

[walaa farouk]

جه ميعاد الكلام للمتزوجين ، و هو حساس شوية و عاوز توازن كبير..

١٠ أفكار..

١-الزواج فيه عمل الهي جمع به شريكي الحياة ، و الأصل أن ما جمعه الله لا يفرقه إنسان ،
و العلاقة دي غير اي علاقة ، عاوزة صبر و تواضع و سجود و نعمة الهية خاصة ..

٢-اي شكوي من صعوبة الحياة فيها طرفين مش طرف واحد غلطان ..
فيه فعل غلط و رد فعل أكثر غلطا من الفعل .. علشان كده الاصلاح لازم للاتنين ..

٣-لما تسمع المشكلة من طرف واحد بتتعاطف معاه لان الفكر اللي بيحتل العقل هو الأول وصولا ليه ..

و ياما مرات نسمع أن الزوج ضرب الزوجة "مثلا" و نكتشف بعدين أنها شتمته و عيرته في رجولته و اهانت امه و عائلته كلها !!

الاتنين غلطوا ؛ حجم الغلط مختلف بس الاتنين مش عارفين يعاملوا بعض و عاوزين إصلاح مشترك ..

٤-المشورة الزوجية هي الباب السليم للحلول.. الافضل و الأكثر سلامة هو ذهاب الاتنين
و هما "متفقين" علي مشير حكيم موثوق فيه
، و استمرار المشورة لفترة طويلة مع الصبر و المثابرة لإصلاح الزواج المتعثر ..

ه-كتير من المشاكل سببها تدخل الأهل و غير المتخصصين .
مرات النصايح غير القائمة علي الخبرة و العلم و الروحانية تعقد المشاكل اكتر .. تاني : "ادي العيش لخبازه" !!

٦-فيه مواضيع عاوزة صلاة كتير و ما بتتحلش غير بالركوع و التوبة الصدقة للاتنين..
و مع آلاف المشاكل اللي بتتعرض علينا أؤكد أن فيه مواضيع ما لهاش حل غير الصلاة الصادقة ..

٧-قبل حل المشاكل علينا التوقف عن المزيد من الجروح و الإهانة و الخلاف .
. قبل ما نتكلم في الإيجابيات، نوقف السلبيات ، علشان تلتئم الجروح أولا..

٨- في الحالات الشديدة ينصح بعد الاتفاق بالانفصال المدروس و لمدة محددة تحت إشراف متخصص..
فيه مشاكل من الصعوبة تحتاج الي هدنة ذكية للشفاء و مراجعة النفس و المشورة المستقلة للطرفين
و لتوقيف نزيف المشاكل..
في الفترة دي كل طرف بيعرف خطورة ما فعل ، و يراجع نفسه
و يصلح سلوكه جوه نفسه بلا حرج أمام الطرف الآخر..

٩-الانفصال الصامت أو الطلاق الصامت جوه المنزل حل يناسب بعض الحالات و يسمي silent divorce
.. فيه الطرفين يعيشوا جوه البيت و يتفقوا معا علي عدم الاحتكاك و الحياة المستقلة و تجنب المناقشات لفترة محسوبة و تحت إشراف مشير متخصص ..
برضه في الفترة دي بنشتغل علي عيوبنا مع المشير لغاية ما نهدا و نرجع لبعض بالتدريج..

١٠-اخر الحلول هو العرض علي المجلس الاكليريكي لدراسة إمكانية الانفصال ..

فيه حالات خيانة و حالات مرض مستعصي و هجر متعمد و إيذاء نفسي مستمر ..

بس بلاش نجري علي الانفصال لأنه له شروط كتابية و كنسية، و لا يتم لمجرد الخلاف البسيط..
و فتح ملف في المجلس دون مبرر يقطع أواصر الود .. علشان كده في المجلس بندي فرصة ٦ شهور
و يمكن اكتر للمشورة الزوجية قبل اي قرار ..

و ربنا هو مصدر السلام و الوئام و النور لكل عيلة ..
امين