حكاية بنت شجاعه !!

Rena Jesus · رقم المشاركة : ( 1 ) 17 - 01 - 2017, 10:54 AM

ناس كتير بتسألني كنتي قافله الاكونت ليه كل المده دي ..
انا كنت بعمل عملية اسمها "تحويل مسار معدة" عملية تخسيس زي عمليات التكميم والتدبيس والحاجات دي.

انا مكنتش قافله الاكونت بس انا كنت طفشانه من الدنيا كلها ومن القرف اللي شوفته الفتره اللي فاتت بسبب اني بنت تخينه عايشه في مصر
الدافع اللي عملت عشانه العمليه مكانش اني اكسب صحتي ولا اني عايزه ابقى رشيقه عشان نفسي والكلام ده،

كان سببه الاول اني اخلص من كمية السخافات اللي بقابلها يوميا،
حتى التحرش اللي هو أزبل حاجه بتواجهها البنات بيبقى بكلام عنصري تجاه البنت التخينه،
الترقيات والتعيينات بقت بالتخن والرفع،
آخر مره عملت انترفيو اترفضت مش عشان انا مش كفؤ لا خالص عشان انا تخينه،
تلاقي ناس بتترقى في شغلك علشان أجسامهم حلوه وواجهة لطيفة مع انهم ككفاءة بطيخ !!

كفايه وانا داخله اي محل ملابس من على الباب مفيش مقاسك،
اخر موقف بقى كان ليلة رأس السنه الدنيا مقفله جدا وواقفين في اشاره والعساكر والظباط موجودين ولقيت حد في عربيه جمبي بيقولي "يلا يا عجله"
ده على اساس ان انا اللي معطله الطريق عشان تخينه حبتين فبصيت للظباط والعساكر كده اللي هو طاب قولوله حاجه لكن محصلش مع اني مسكتش وهزقته بس روحت مكسوره من جوايا،

افتكرت اكل الدايت اللي بقالي سنين عايشه عليه
افتكرت ان حتى وانا طفله في المدرسه كنت بتحرم من عروض الرقص اللي بحبها جدا عشان تخينه،
افتكرت لما في مره دخلت محل فالبنت اللي هناك قالتلي لا انتي ممكن تلاقي مقاسك في محل الحوامل اللي جمبنا فيه حاجات حلوه،
وافتكرت لما كان عندي مناسبه مهمه في يوم ونازله اشتري فستان ودخلت محل فماسكه فستان ببص عليه لسه لقيت واحده شغاله في المحل قالتلي لاء مش هيخش فيكي والفستان اصلا مكانش عاجبني قولتلها طب انا هقيسه بقى قالتلي هيتقطع طلبت المدير جه واعتذرلي وقالي اتفضلي قيسيه دخلت البروفه فضلت اعيط ورميته عالارض ومقيستوش اصلا،
ده غير كلمة يا مدام اللي بتتقال في الرايحه والجايه، وسواق الميكروباص اللي الاقيه بيقولي بقولك ايه يا ابله ما تاخدي الكرسيين اللي قدام اللي بقيت باخدهم قبل ما يقول،
وافتكرت العريس اللي كان متقدملي قبل العمليه باسبوعين وهو اصلا بكرش واصلع ولقيته بيقولي هو انتي مبتفكريش تخسي؟!! في حين اني مأحرجتوش ولا قولتله ما تبص لنفسك،
افتكرت الكومنت اللي عليه لايكس كتيره اوي على فيديو لبنت تخينه
"هو الدب القطبي ظهر امتى؟"،
افتكرت جملة شفطتي الهوا اللي بتتقال على سبيل الهزار اول ما ادخل اي مكان،
وافتكرت صحابي لما يشوفوا اي حد تخين في التلفزيون الاقيهم بيقولولي الحقي دي شبهك،
افتكرت الطنطات اللي كل ما يشوفوني ايه مش ناويه تخسي طب جربتي وصفة عين العفريت على مسحوق الترمس المطحون طاب جربتي تلفي الورق الحراري على بطنك،
افتكرتني وانا بتريق على نفسي واقعد اقول الفراشه راحت الفراشه جت قبل ماحد يتريق عليا،
افتكرت اني كنت واثقه في نفسي واستغربت ان المجتمع ده قدر يهزني بسهوله
افتكرت ان بقالي كتير مقهوره وساكته،

فضلت بعدها 3 ايام مبعملش حاجه غير اني بعيط لحد ما اخدت قرار العمليه مع اني كنت اعرف ان في ناس ماتت وهي بتعملها وناس جسمها اتشوه وعرفت انها من اخطر عمليات الجهاز الهضمي بس صممت وعملتها لاني كنت كده كده مش عايشه.

دي مواقف مش حصلتلي لوحدي دي مواقف حصلت ولسه بتحصل لكل بنت تخينه عايشه في مصر ومعاناة اي حد شكله مش على مزاج الناس.