تاملات فى سفر نحميا الاصحاح السادس من الايه 1 لـــ 10

[بنتك يايسوع]

تاملات فى سفر نحميا الاصحاح السادس من الايه 1 لـــ 10

الايتين 1 و 2 بيقولوا

1 ولما سمع سنبلط وطوبيا وجشم العربي وبقية أعدائنا أني قد بنيت السور ولم تبق فيه ثغرة، على أني لم أكن إلى ذلك الوقت قد أقمت مصاريع للأبواب
2 أرسل سنبلط وجشم إلي قائلين: هلم نجتمع معا في القرى في بقعة أونو. وكانا يفكران أن يعملا بي شرا


هنا نحميا بيقول انه خلاص بنى السور ومبقاش فيه حتى ثغره يعني خلاص انا بنيت حياتي الروحيه مع ربنا وبقي ليا عشره معاه ومبقاش فيه ثغره يعني مبقاش فيه ضعف او خطيه ممكن تخليني اسيب ربنا تانى
بس اول ما الاعداء سمعوا كده بقي اكيد الكلام مش عجبهم ازاى يعني يبقالك عشره مع ربنا واحنا موجودين لا فكروا انهم يعملوا شر معاه يعني يوقعوه ف الخطيه تانى قالولوا تعالى اجتمع معانا يعني تعالى فكر ف الخطيه دي كده مش دي اللى كانت بتخيليك مبسوط ازاى بس هاتسيبها دلوقتى
وطبعا هايعرضوا عليه عروووووض كتيييييير ف الاجتماع ده
ــــــــــــــــــــــ
بس نحميا هيورينا رده ف الايه 3 اللى بتقول

3 فأرسلت إليهما رسلا قائلا: إني أنا عامل عملا عظيما فلا أقدر أن أنزل. لماذا يبطل العمل بينما أتركه وأنزل إليكما


بجد كان رد اكتر من راااااائع من نحميا بيقولهم انا بعمل عمل عظيم ازاى يعني اسيبه واجى اجتمع معاكوا ليه العمل يبطل لما اسيبه واجيلكوا
يعني معناها لا يا شيطان انا مش هتمادى ف افكارى معاك ولا هديلك فرصه تفكرنى بخطيه فاتت ولا هديلك فرصه تعرض عليا خطيه جديده ليه بسببك انا اسيب العمل العظيم اللى هو حياتي الروحيه وعشرتى مع ربنا ليه اهد كل ده عشان اقعد معاك انت وانا عارف اصلا انك عدوى وانك بعتلى مش حبا فيا وانما عشان تعطلنى عن البناء وتشغلنى عن ابديتي
ـــــــــــــــــــــــــــــــــ
بس الشيطان مابيزهقش ودايما زنان وده اللى بيقوله الايتين رقم 4 و 5


وأرسلا إلي بمثل هذا الكلام أربع مرات، وجاوبتهما بمثل هذا الجواب
5 فأرسل إلي سنبلط بمثل هذا الكلام مرة خامسة مع غلامه برسالة منشورة بيده مكتوب فيها


يعني قعد يقوله الكلام ده مره واتنين وتلاته واربعه وخمسه بس نحميا كان ثابت اه ما اصله بنى السور كوويس ومبقاش فيه ولا حتى ثغره يبقي ايه اللى هايوقعه بقي عرف يحسبها صح ويصد كل ضربات الشيطان
ـــــــــــــــــــــــــــــــــ
الايتين 6 و 7 بيقولوا

6 قد سمع بين الأمم، وجشم يقول: إنك أنت واليهود تفكرون أن تتمردوا، لذلك أنت تبني السور لتكون لهم ملكا حسب هذه الأمور
7 وقد أقمت أيضا أنبياء لينادوا بك في أورشليم قائلين: في يهوذا ملك. والآن يخبر الملك بهذا الكلام. فهلم الآن نتشاور معا


هنا الشيطان بيقول لنحميا ايه ده كل الناس بتقول ان انت واليهود متمردين وانك بتبني السور عشان تكون ملك عليهم بقولك تعالى نتشاور مع بعض
يعني الشيطان اول ما يلاقينا خلاص سيبنا الخطيه وبدا نبعد عن بعض اصحابنا اللى كانوا سبب ف خطايانا دي نلاقيه متغاظ جدااا ويقعد يقول ازاى يعني اسيبهم يعيشوا مع ربنا ويضيعوا كل تعبى ف وقوعهم السنين اللى فاتت دي
ويدينا بقي ف الافكار ايه ده انتوا بداتوا تتكبروا كده على اصحابكم هو المسيح مش قال احبوا اعدائكم وانتوا جايين تبعدوا عن اصحابكم عشان خاطيين لا ياسيدي احنا مش بنبعد عنهم عشان خاطيين مااحنا كلنا تحت الضعف انما احنا مستعدين نبعد عن اى حاجه ممكن تخسرنا حياتنا مع المسيح
ــــــــــــــــــــــــــــــــ
الايه رقم 8 بتقول

فأرسلت إليه قائلا: لا يكون مثل هذا الكلام الذي تقوله، بل إنما أنت مختلقه من قلبك

هنا نحميا بيقوله انت كداب انا مش قصدى كده وكل الكلام ده من تاليفك انت يعني انا مش هتكبر على الناس لا انا كل غرضى يكون ليا حياه حلوه مع ربنا
ـــــــــــــــــــــــــــــــ
الايه رقم 9 بتقول

9 لأنهم كانوا جميعا يخيفوننا قائلين: قد ارتخت أيديهم عن العمل فلا يعمل. فالآن يا إلهي شدد يدي

والايه دي بجد جميله جداااااا ومهمه اووووووووووى
ده اللى الشيطان بيعمله معانا كلنا يفضل يخوفنا ويقولنا انت مش هاتقدر تكمل ولا كمان لو ف وسط توبتى ورجوعى لربنا غصب عني عملت خطيه يقوم ييجي يقولى شوفتى يابنتى اديكي رجعتى تانى للخطيه مش قلنا انك مش هاتعرفى تعيشي مع ربنا ده انتى كلك ذنوب كملى بقي ف اللى انتى فيه ومتفكريش ف التوبه التانى لحد ما تكونى قادره على كده بس كلنا هانرد عليه رد نحميا الجميل وهانقول لربنا حتى يارب ان كان الكلام ده حقيقي وانا فعلا ايديا ارتخت عن العمل فعلا بعدت عنك فعلا توبتى مش صادقه شدد انت ايديا اديني انت القوه ساعدنى تكون توبتي دي صادقه حتى لو مش من قلبى ساعدنى انت انها تكون من قلبى وحقيقيه
ــــــــــــــــــــــــــــ
الايه رقم 10 بتقول

10 ودخلت بيت شمعيا بن دلايا بن مهيطبئيل وهو مغلق، فقال: لنجتمع إلى بيت الله إلى وسط الهيكل ونقفل أبواب الهيكل، لأنهم يأتون ليقتلوك. في الليل يأتون ليقتلوك


ده اللى المفروض نعمله عشان نقدر نقاوم الشيطان ونبعد عن حيله وفخاخه اللى ناصبها لينا اننا نستخبي ف حضن الكنيسه هى اللى قدره تحمينا من كل حروبه وتجاربه بالتناول والصلاه والاعتراف وكل وسائط النعمه اللى بتوفرهالنا الكنيسه بسسسسسس هانقدر نقاوم الشيطان ومش هايقدر يقتلنا ولا يقرب مننا طول ما معانا يسووووووووووووووووووووع

اذكـــــــرونــى فـى صلــواتكـــم


mrmr bent elbaba

[Mary Naeem]

مشاركة جميلة جدا


ربنا يبارك حياتك